Sudandagi mojaro: Yevropa Ittifoqi elchisi hujumga uchradi, Xartumda yondirilgan samolyotlar surati e’lon qilindi

Sudandagi mojaro paytida Yevropa Ittifoqining mamlakatdagi elchisi, irlandiyalik diplomat Eydan O’Xara Xartumdagi uyida hujumga uchradi. Bu haqda Yevropa Ittifoqining tashqi ishlar va xavfsizlik bo‘yicha oliy vakili Jozep Borrel ma’lum qildi.

Borrel hujum tafsilotlarini oshkor qilmadi, ammo elchining ahvoli hozir yaxshi ekanini aytdi.

“Diplomatik binolar va xodimlarning xavfsizligi Sudan hukumati zimmasida”, — deb yozdi u Twitter’da.

YI matbuot kotibi Nabila Massrali ham xodimlarning xavfsizligi ustuvor ahamiyatga ega ekanini, ammo bu hujumdan keyin YI delegatsiyasi Xartumdan evakuatsiya qilinmaganini aytdi.

Massralining aytishicha, diplomatik missiya xavfsizlik choralarini baholamoqda.

Janglarning uchinchi kuni

17-aprel dushanba kuni Sudanda armiya va Tezkor harakat kuchlari (RSF) o‘rtasidagi janglarning uchinchi kuni bo‘ldi.

Har ikki tomon ham Xartumdagi asosiy inshootlarni nazoratga olganini da’vo qilmoqda, shahar aholisiga uylarini tark etishga ruxsat berilmayapti, odamlar otishma va portlashlardan yashirinishga urinmoqda.

Maxar kompaniyasi Xartum xalqaro aeroportining sun’iy yo‘ldoshdan olingan suratlarini chop etdi. Kadrlarda ko‘plab samolyotlar yoqib yuborilganini ko‘rish mumkin.

BMTning Sudandagi vakili Volker Pertes bergan ma’lumotlarga ko‘ra, mojaroda 1 800 dan ortiq tinch aholi va jangarilar jarohat olgan. U jurnalistlarga 185 ga yaqin odam vafot etganini aytdi. Avvalroq to‘qnashuvlarda BMTning 3 nafar xodimi halok bo‘lgani haqida xabar berilgandi.

AQSH Davlat departamenti matbuot kotibi Jon Kirbining aytishicha, xavfsizlik xavotirlari davom etayotganiga va Xartum aeroporti yopilganiga qaramay, hozirda amerikalik xodimlarni evakuatsiya qilish rejasi yo‘q.

Ammo u Sudandagi amerikaliklarni vaziyatga jiddiy qarashga chaqirdi.