Misr Rossiyaga yashirincha minglab raketalar yetkazib berishni rejalashtirgan — WP

Pentagonning internetga “sizdirilgan” maxfiy razvedka hujjatlaridan ma’lum bo‘lishicha, Misr prezidenti Abdulfattoh as-Sisi Rossiyaga jo‘natish uchun 40 000 tagacha raketalarni yashirincha ishlab chiqarishni rejalashtirgan. Bu haqda The Washington Post xabar bermoqda.

Discord platformasida e’lon qilingan hujjatlarga ko‘ra, Misrda Rossiyaga raketa yetkazib berish fevral oyida muhokama qilingan. Raketadan tashqari artilleriya snaryadlari va porox yetkazib berish imkoniyati ham ko‘rib chiqilgan.

WP so‘roviga izoh berar ekan, Misr Tashqi ishlar vazirligi vakili “mamlakat pozitsiyasi boshidanoq (urushga) aralashmaslikka asoslangan”ini aytdi.

“Biz har ikki tomonni harbiy harakatlarni to‘xtatish va muzokaralar yo‘li bilan siyosiy yechimga kelishga chaqirishda davom etamiz”, — dedi amaldor.

Shu bilan birga, AQSH hukumatining ismini oshkor qilishni istamagan vakili aytishicha, Misrning bunday rejalari amalga oshirilgani bo‘yicha hozircha biror belgi yo‘q.

“Buning amalga oshganini ko‘rmadik”, — dedi rasmiy.

WP Misr AQSH bilan hamkorlikni kuchaytirib kelayotganini eslatdi Xususan, Qo‘shma Shtatlar o‘n yillar davomida mamlakatga har yili bir milliard dollardan ortiq harbiy yordam ko‘rsatib keladi.

“Misr bizning Yaqin Sharqdagi eng azaliy ittifoqchilarimizdan biri. Agar Sisi Rossiya uchun Ukrainada qo‘llanilishi mumkin bo‘lgan raketalarni yashirincha ishlab chiqarayotgani rost bo‘lsa, munosabatlarimizni jiddiy qayta ko‘rib chiqishimiz kerak”, — dedi senator Kris Merfi.

Hujjatlarga ishonilsa, raketa masalasida Sisi ishtirokidagi muhokama 1-fevralda bo‘lib o‘tgan. Undan bir necha kun oldin AQSH Davlat kotibi Entoni Blinken Qohiraga tashrif buyurib, Misr prezidenti bilan uchrashgan edi. Blinkenning tashrifidan so‘ng darhol Misr tashqi ishlar vaziri Sameh Shukri Rossiya rahbarlari bilan muzokaralar o‘tkazish uchun Moskvaga kelgan.

G‘arb OAVlari aprel oyi boshida ijtimoiy tarmoqlarda paydo bo‘lgan Pentagon maxfiy hujjatlarining sizdirilishi haqida xabar bera boshladi. E’lon qilingan hujjatlarda Qo‘shma Shtatlar nafaqat potensial raqiblari, balki ittifoqchilari ustidan ham josuslik qilayotgani haqida dallilar, shuningdek, AQSH va NATOning Ukraina Qurolli kuchlarini bo‘lajak qarshi hujum oldidan qanday tartibda tayyorlash rejalari mavjud. 

Pentagon tarmoqqa o‘ta maxfiy ma’lumotlar tarqalib ketganini tan oldi. Hozirda bu holat yuzasidan tekshiruv o‘tkazilmoqda.