Миср ҳукумати Россия қўшинлари учун реактив снарядлар ишлаб чиқариш режасидан воз кечди. Бундай қарор АҚШ аралашувидан кейин қабул қилинган, деб ёзмоқда The Washington Post газетаси Америка разведкасининг интернетда тарқалган махфий ҳужжатларига таяниб.
Аввалроқ ўша махфий ҳужжатлардан февраль ойида Миср президенти Абдул Фаттоҳ ас-Сиси Россияга топшириш учун яширинча 40 мингта реактив снаряд ишлаб чиқариш режасини тайёрлашга кўрсатма бергани маълум бўлганди.
Бироқ март ойи бошида Америка расмийлари, жумладан, Пентагон раҳбари Ллойд Остин Мисрга ташриф буюрганидан сўнг, Россияга снаряд етказиб бериш режасига “пауза қўйилган”.
Бунинг ўрнига, деб ёзади The Washington Post, Миср Украина армиясига бериш учун АҚШга 152 ва 155 миллиметрли артиллерия снарядларини сотишга рози бўлган. Нашр буни Жо Байден маъмуриятининг “очиқ дипломатик ғалабаси” деб ҳисобламоқда.
АҚШ махфий ҳужжатларининг тарқалиши
Сўнгги ҳафтада интернетда АҚШ разведкаси ва мудофаасига оид бир қатор махфий ҳужжатлар эълон қилинди, уларда жумладан, Украина ва Россия қўшинларининг ҳолати ҳақида баён қилинган. 13 апрель куни АҚШ расмийлари ҳужжатларни сиздиришда гумон қилиб, ҳарбий-ҳаво кучларининг 21 ёшли ходими Жек Тейшейрани ҳибсга олди. Йигитнинг дўстлари у уруш бошланганидан бери махфий ҳужжатларни улашиб келганини айтишди.
12 апрель куни Washington Post газетаси Украина об-ҳаво шароити, ускуналар етказиб беришнинг секинлиги, ўқ-дорилар тақчиллиги ва махфий ҳужжатларнинг эълон қилиниши туфайли баҳорга режалаштирилган қарши ҳужумни кейинга қолдиргани ҳақида ёзди. Украина бош вазири Денис Шмигал қарши ҳужум ёзда бошланиши мумкинлигини айтган.
Пентагоннинг интернетга сиздирилган махфий ҳужжатида Украина армияси 30 апрель куни қарши ҳужум бошлашни режалаштиргани айтилган.
Изоҳ (0)