Britaniya harbiy havo kuchlari 17-aprel kuni Finlyandiya ko‘rfazi va Boltiq dengizi uzra NATO havo hududiga yaqin masofada uchayotgan Rossiyaning ikkita qiruvchi va bitta razvedkachi samolyotini tutib oldi. Bu haqda The Independent xabar berdi.
Ma’lum qilinishicha, Britaniya va Germaniya harbiy-havo kuchlarining Eurofighter Typhoon qiruvchi samolyotlari NATO chegarasining sharqiy qismiga, Estoniya yaqiniga ko‘tarilgan. Havoda Rossiyaning Il-20 razvedka samolyoti aniqlangan, u Kaliningradga parvoz qilgan. Unga ikkita Su-27 Flanker-B qiruvchi samolyoti hamrohlik qilgan.
Operatsiyada qatnashgan uchuvchilardan birining so‘zlariga ko‘ra, qirollik havo kuchlari Boltiq dengizi uzra Rossiya samolyotlarini tez-tez uchratadi, shuning uchun ham aviatexnikalarni tutib qolish odatiy holdir.
“Shunga qaramay, Rossiya samolyotlarini tutib olishning ahamiyati va NATO havo hududini jamoaviy mudofaa qilishga sodiqlik o‘zgarishsiz va qat’iy bo‘lib qolmoqda. Aviatexnikalarni tutib olish nemis ittifoqchilarimiz bilan tez va qat’iy harakat qilishimiz mumkinligini isbotladi”, — deydi uchuvchi.
15-martda ham Buyuk Britaniya Qirollik havo kuchlari va Germaniya qiruvchi samolyotlari Estoniya havo hududida Rossiya samolyotini birinchi qo‘shma operatsiyada tutib olgandi. Rossiya samolyoti Estoniya havo harakatini boshqarish xizmatini ogohlantirmagani qayd etilgandi.
Izoh (0)