Судандаги можаро пайтида Европа Иттифоқининг мамлакатдаги элчиси, ирландиялик дипломат Эйдан О’Хара Хартумдаги уйида ҳужумга учради. Бу ҳақда Европа Иттифоқининг ташқи ишлар ва хавфсизлик бўйича олий вакили Жозеп Боррель маълум қилди.
Боррел ҳужум тафсилотларини ошкор қилмади, аммо элчининг аҳволи ҳозир яхши эканини айтди.
“Дипломатик бинолар ва ходимларнинг хавфсизлиги Судан ҳукумати зиммасида”, — деб ёзди у Twitter’да.
ЕИ матбуот котиби Набила Массрали ҳам ходимларнинг хавфсизлиги устувор аҳамиятга эга эканини, аммо бу ҳужумдан кейин ЕИ делегацияси Хартумдан эвакуация қилинмаганини айтди.
Массралининг айтишича, дипломатик миссия хавфсизлик чораларини баҳоламоқда.
Жангларнинг учинчи куни
17 апрель душанба куни Суданда армия ва Тезкор ҳаракат кучлари (RSF) ўртасидаги жангларнинг учинчи куни бўлди.
Ҳар икки томон ҳам Хартумдаги асосий иншоотларни назоратга олганини даъво қилмоқда, шаҳар аҳолисига уйларини тарк этишга рухсат берилмаяпти, одамлар отишма ва портлашлардан яширинишга уринмоқда.
Maxar компанияси Хартум халқаро аэропортининг сунъий йўлдошдан олинган суратларини чоп этди. Кадрларда кўплаб самолётлар ёқиб юборилганини кўриш мумкин.
.jpg)
БМТнинг Судандаги вакили Волкер Пертес берган маълумотларга кўра, можарода 1 800 дан ортиқ тинч аҳоли ва жангарилар жароҳат олган. У журналистларга 185 га яқин одам вафот этганини айтди. Аввалроқ тўқнашувларда БМТнинг 3 нафар ходими ҳалок бўлгани ҳақида хабар берилганди.
АҚШ Давлат департаменти матбуот котиби Жон Кирбининг айтишича, хавфсизлик хавотирлари давом этаётганига ва Хартум аэропорти ёпилганига қарамай, ҳозирда америкалик ходимларни эвакуация қилиш режаси йўқ.
Аммо у Судандаги америкаликларни вазиятга жиддий қарашга чақирди.
Изоҳ (0)