Rossiyaning Ukrainaga keng ko‘lamli bosqini munosabati bilan Shimoliy Atlantika alyansi (NATO) mudofaa konsepsiyasini o‘zgartirishga qaror qildi – endi alyans har qanday hujumning birinchi kunidanoq o‘z yerlarining “har bir dyuymini” himoya qilishga tayyorlanmoqda, deb xabar berdi The New York Times.
Gazetaning ta’kidlashicha, ilgari NATO strategiyasi potensial raqibni qasos bilan tahdid qilish orqali to‘xtatishdan iborat edi: alyans ittifoqchi kuchlar yordamga kelguniga qadar a’zo davlatlarning hududlari bosib olinishga qo‘yib berar edi. Endi NATO “man etish orqali to‘xtatish” strategiyasiga o‘tmoqda. Amalda, bu, boshqa narsalar qatori, alyansning sharqiy ya’ni Rossiya bilan chegarasida qo‘shinlar sonining ko‘payishini anglatadi.
NYT yozishicha, alyans o‘z harbiy ishtirokini yanada namoyishkorona olib borishni ham rejalashtirmoqda. NATO bosh kotibining sobiq yordamchisi Kamil Grandning so‘zlariga ko‘ra, endilikda alyans Rossiya chegarasida qo‘shinlarini haddan tashqari to‘plab, Moskvani bezovta qilib qo‘ymaslikni o‘ylamayapti, balki ehtimoliy hujumni qaytarish uchun u yerga qancha qo‘shin joylashtirish kerakligini muhokama qilmoqda.
Yangi strategiya doirasida NATO qo‘shinlarining yanada ko‘proq qismi Yevropadagi AQSH kuchlariga qo‘mondonlik qiluvchi amerikalik general Kristofer Kavolining bevosita nazorati ostiga o‘tadi, deb ta’kidladi The New York Times. Alyans vakilining anonimlik sharti bilan aytishicha, aynan Kavoli zimmasiga AQSH va ittifoqchilarning harbiy rejalarini birlashtirish vazifasi yuklangan. Manbaga ko‘ra, endi alyansga a’zo davlatlar Sovuq urushdan keyin birinchi marta urush sodir bo‘lgan taqdirda, NATO aniq nima qilishini va o‘zlari ham alohida nima qilishi kerakligini aniqlashtirib oladi.
Strategiyani o‘zgartirishni Boltiqbo‘yi mamlakatlari talab qildi
NATOning mudofaa konsepsiyasini qayta ko‘rib chiqishni birinchilardan bo‘lib Boltiqbo‘yi mamlakatlari talab qilgan, chunki eski konsepsiya ushbu mamlakatlarning hududini 180 kundan keyin ozod qilish sharti bilan bosib olinishiga imkon berar edi. Xususan, Estoniya bosh vaziri Kaya Kallasning aytishicha, Boltiqbo‘yi davlatlaridan istalgan biri Rossiya qo‘shinlari tomonidan shunday uzoq vaqt bosib olinsa, bu davlat butunlay vayron bo‘lishi mumkin.
Britaniya mudofaa vaziri Ben Uolles ham alyans strategiyasini xuddi shunday baholadi. Boshqa narsalar qatorida, u hujum sodir bo‘lgan taqdirda NATO endi Estoniyaga tanklarni 60 kunda yubormasaligini, chunki bu muddat ichida Estoniya joyida bo‘lmasligini aytdi.
Izoh (0)