Россиянинг Украинага кенг кўламли босқини муносабати билан Шимолий Атлантика алянси (НАТО) мудофаа концепциясини ўзгартиришга қарор қилди – энди алянс ҳар қандай ҳужумнинг биринчи куниданоқ ўз ерларининг “ҳар бир дюймини” ҳимоя қилишга тайёрланмоқда, деб хабар берди The New York Times.
Газетанинг таъкидлашича, илгари НАТО стратегияси потенсиал рақибни қасос билан таҳдид қилиш орқали тўхтатишдан иборат эди: алянс иттифоқчи кучлар ёрдамга келгунига қадар аъзо давлатларнинг ҳудудлари босиб олинишга қўйиб берар эди. Энди НАТО “ман этиш орқали тўхтатиш” стратегиясига ўтмоқда. Амалда, бу, бошқа нарсалар қатори, алянснинг шарқий яъни Россия билан чегарасида қўшинлар сонининг кўпайишини англатади.
NYT ёзишича, алянс ўз ҳарбий иштирокини янада намойишкорона олиб боришни ҳам режалаштирмоқда. НАТО бош котибининг собиқ ёрдамчиси Камил Гранднинг сўзларига кўра, эндиликда алянс Россия чегарасида қўшинларини ҳаддан ташқари тўплаб, Москвани безовта қилиб қўймасликни ўйламаяпти, балки эҳтимолий ҳужумни қайтариш учун у ерга қанча қўшин жойлаштириш кераклигини муҳокама қилмоқда.
Янги стратегия доирасида НАТО қўшинларининг янада кўпроқ қисми Европадаги АҚШ кучларига қўмондонлик қилувчи америкалик генерал Кристофер Каволининг бевосита назорати остига ўтади, деб таъкидлади The New York Times. Алянс вакилининг анонимлик шарти билан айтишича, айнан Каволи зиммасига АҚШ ва иттифоқчиларнинг ҳарбий режаларини бирлаштириш вазифаси юкланган. Манбага кўра, энди алянсга аъзо давлатлар Совуқ урушдан кейин биринчи марта уруш содир бўлган тақдирда, НАТО аниқ нима қилишини ва ўзлари ҳам алоҳида нима қилиши кераклигини аниқлаштириб олади.
Стратегияни ўзгартиришни Болтиқбўйи мамлакатлари талаб қилди
НАТОнинг мудофаа концепциясини қайта кўриб чиқишни биринчилардан бўлиб Болтиқбўйи мамлакатлари талаб қилган, чунки эски концепция ушбу мамлакатларнинг ҳудудини 180 кундан кейин озод қилиш шарти билан босиб олинишига имкон берар эди. Хусусан, Эстония бош вазири Кая Калласнинг айтишича, Болтиқбўйи давлатларидан исталган бири Россия қўшинлари томонидан шундай узоқ вақт босиб олинса, бу давлат бутунлай вайрон бўлиши мумкин.
Британия мудофаа вазири Бен Уоллес ҳам алянс стратегиясини худди шундай баҳолади. Бошқа нарсалар қаторида, у ҳужум содир бўлган тақдирда НАТО энди Эстонияга танкларни 60 кунда юбормасалигини, чунки бу муддат ичида Эстония жойида бўлмаслигини айтди.
Изоҳ (0)