Toshkent shahridagi mudofaa ishlari bo‘limlaridan birining boshlig‘i pora bilan qo‘lga tushdi.
Qayd etilishicha, Davlat xavfsizlik xizmatining Toshkent shahar bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamentining shahar boshqarmasi bilan hamkorlikda tezkor tadbir o‘tkazilgan. Tadbirda Toshkent shahridagi tumanlardan birining Mudofaa ishlari bo‘limi boshlig‘i fuqaroga noqonuniy ravishda harbiy guvohnoma rasmiylashtirib berish evaziga o‘z xizmat avtomashinasida undan 600 dollar olgan vaqtida ashyoviy dalillar bilan ushlangan.
Boshqa bir holatda esa Sirdaryo viloyatidagi Aholi bandligiga ko‘maklashish markazlaridan birining direktori yoshlarni kasbga o‘rgatish bilan shug‘ullanuvchi MCHJ rahbaridan uning o‘quv markazida tahsil olayotganlarning darslarga qatnashish holatini monitoring qilmaslik va MCHJ faoliyati bo‘yicha tekshiruv o‘tkazmaslik evaziga pul talab qilgani aniqlangan.
U MCHJ rahbaridan 300 dollar talab qilib, muqaddam 2 million so‘m olgan. DXX xodimlari tomonidan boshqa huquqni muhofaza qiluvchi organlar bilan hamkorlikda o‘tkazilgan tezkor tadbirda gumonlanuvchi qolgan 1,4 million so‘mni o‘z xizmat xonasida olgan vaqtida ushlangan.
Hozirda mazkur mansabdor shaxslarga nisbatan Jinoyat kodeksining 210-moddasi (pora olish) bilan jinoyat ishlari qo‘zg‘atilib, qamoqqa olish tarzidagi ehtiyot chorasi qo‘llanilgan.
Izoh (1)
мақолада тўлиқ маълумот берилмаган. бунақа ёлғон маълумотлар кўпайиб кетди охирги пайтларда. балким сайтлар обуначиларни қизиқтириш учун шунақа бўлмағур маълумотлар тарқатаётгандир. қонунда жиноят белгиданган ёлғон хабар учун