Farg‘ona viloyati O‘zbekiston tumanida yer nazorati inspektori lavozimida ishlovchi shaxs pora olayotgan vaqtida ushlandi. Bu haqda “Mening yurtim” telekenali orqali uzatilgan lavhada ma’lum qilindi.
Qayd etilishicha, O‘zbekiston tumani hokimligi Qishloq xo‘jaligi bo‘limi yer nazorati inspektori 10 nafar fuqaroga qishloq xo‘jaligi mahsulotlari uchun 3 gektar yerni ochiq elektron tanlovda yutib berish evaziga 4 ming AQSH dollari so‘rab kelayotgani aniqlangan.
Farg‘ona viloyati IIB hamda Bosh prokuratura huzuridagi departamentning viloyat bo‘limi xodimlari hamkorligida o‘tkazilgan tezkor tadbirda Yaypan shaharchasi markazida joylashgan savdo markazi yonida inspektor arizachidan 10 dona fuqarolik pasporti va 4 ming AQSH dollari olayotganida qo‘lga olindi.
Hozirda holat yuzasidan tergovga qadar tekshiruv harakatlari olib borilmoqda.
Yer olib berishga oid holatlar
Aprel boshida Sirdaryoda o‘zganing 5 sotix yerini 7,4 ming AQSH dollariga sotishga uringan shaxs ushlangan edi. Shuningdek, Buxoroda hokimlik zaxirasidagi 10 sotix yerni sotishga uringan shaxs qo‘lga olingani, Toshkent viloyatida g‘isht zavodini auksionda arzon narxga olib berishni va’da qilgan shaxslar ushlangani, Qashqadaryoda ikki nafar hokim yordamchisiga nisbatan jinoyat ishi qo‘zg‘atilgani to‘g‘risida xabar berilgandi.
Izoh (0)