Qashqadaryo viloyati IIB tezkor-qidiruv xizmati xodimlari tomonidan bank kartalaridagi mablag‘larni o‘zlashtirgan bank xodimi aniqlandi. Bu haqda IIV axborot xizmati xabar berdi.
Qayd etilishicha, “Xalq banki” G‘uzor tumani boshqaruvchisi IIB boshlig‘iga ariza yozib, noma’lum shaxslar tomonidan bank kassiriga tegishli dasturdagi shaxsiy login va parol orqali boshqa fuqaroning telefon raqamini kiritgan holda 3 nafar mijozning pul mablag‘lari yechib olinganini bildirgan.
Dastlabki tergov harakatlari va texnik ishlanmalar natijasida ushbu jinoiy harakatni bank filiali boshqaruvchisining haydovchisi sodir etgani ma’lum bo‘lgan. Haydovchi kassirning login va parollarini bilib olgan va bank monitoring xonasidagi kompyuter orqali tizimga kirib, ko‘plab fuqarolarga tegishli 50 million so‘mdan ortiq mablag‘larni o‘zlashtirgan.
Holat yuzasidan Jinoyat kodeksining 169-modda (O‘g‘irlik) 3-qismi bilan jinoyat ishi qo‘zg‘atilgan.
Fevral o‘rtalarida Namanganda mijozlarning plastik kartalaridan 440 million so‘m yechib olgan bank xodimi qo‘lga olingani to‘g‘risida xabar berilgandi. Yanvarda bo‘lsa, Buxoroda korxona rahbari bank sobiq mas’ullari bilan til biriktirib 1,3 mlrd so‘m kredit pullarni o‘zlashtirgani ma’lum bo‘lgan edi.
Izoh (0)