“Daryo”da chop etilgan “Oqdaryoda xizmatga chaqirilish muddatini qoldirish evaziga 100 dollar olgan Mudofaa ishlari bo‘limi xizmatchisi sud qilinganligi” to‘g‘risida xabar yuzasidan Oqdaryo tumani mudofaa ishlar bo‘limi boshlig‘i Hikmat Otayev o‘z munosabatini bildirdi.
— O‘zbekiston Respublikasi Jinoyat Kodeksining 25, 168-moddasi (firibgarlik) 1-qismi va 28, 211-moddasi (pora berish) 1-qismi bilan aybli deb topilgan Husniyor Tilavov Oqdaryo tumani mudofaa ishlari bo‘limi xodimi hisoblanmaydi, deydi Hikmat Otayev. — Oqdaryo tumani hokimligi tomonidan 2012-yilning 17-dekabrida Husniyor Tilavov “Zarafshon” qishloq fuqarolar yig‘inida harbiy hisob vazifasiga tayinlangan. 2019-yilning 29-iyun kuni egallab turgan lavozimidan ozod etilgan.
Jinoyat ishlari bo‘yicha Oqdaryo tumani sudi tomonidan joriy yilning 13-avgust kuni o‘tkazilgan sudda Husniyor Tilavov hech qayerda ishlamasligi bayon etilgan.
Husniyor Tilavov xizmat vazifasiga Oqdaryo tumanidagi “Oqdaryo”, “Pichoqchi”, “Olchintepa” va “Z.M.Bobur” mahalla fuqarolar yig‘ini hududlari bo‘yicha harbiy hisobga olish (harbiy xizmatga majbur fuqarolarni harbiy safarbarlikka jalb qilish, safarbarlik chaqiruv rezervi xizmatiga chaqiriluvchilar bilan harbiy xizmatni o‘tash to‘g‘risidagi shartnomalarni tuzish, maxsus hisob raqamga badal to‘lovlarini amalga oshirilishini tashkillashtirish kabi vazifalar yuklatilgan) vakolati berilgan.
Biroq Husniyor Tilavov o‘zgalarga Mudofaa ishlari bo‘limi xizmatchisi sifatida rezervchilar va harbiy xizmatga majburlarni xizmatga chaqirilish muddatini keyinga qoldiruvchi shaxs sifatida namoyon qilib kelgan.
Izoh (0)