Olmaliq mudofaa ishlari bo‘limi boshlig‘i ayol kishiga qo‘l ko‘targani aytilmoqda. Holat yuzasidan surishtiruv boshlangan

O‘zbekiston Mudofaa vazirligi ijtimoiy tarmoqlarda tarqalgan Olmaliq shahrida harbiy xizmatchining ayol kishiga qo‘l ko‘targani tasvirlangan videoga munosabat bildirdi.

Ijtimoiy tarmoqlarda Toshkent viloyati Olmaliq shahar mudofaa ishlari bo‘limi boshlig‘i deya aytilayotgan harbiy xizmatchi buyum bozorida ayol kishiga qo‘l ko‘targani aks etgan video tarqaldi. Videodan ko‘rish mumkinki, mojaro ayol o‘z farzandining safarbarlik chaqiruv rezervida (bir oylik armiya) bir oylik yig‘inlarda ishtirok etishi uchun shartnoma pulini to‘lamayotgani sabab kelib chiqqan.

Vazirlik matbuot xizmatining ma’lum qilishicha, hozirda Toshkent harbiy okrugi qo‘mondonligi va Harbiy prokuratura mazkur holat yuzasidan surishtiruv ishlarini boshlagan.

“Tekshiruv natijasi yuzasidan qo‘shimcha xabar beriladi. Holat Mudofaa vazirligi tomonidan nazoratga olingan”, — deyiladi xabarda.

Avvalroq O‘zbekistonda ijtimoiy himoyaga muhtoj yoshlarning “bir oylik xizmat”ni o‘tash badali qoplab berilishi ma’lum qilingandi.