“Toshshahartransxizmat” poytaxtdagi jamoat transportlariga ayol va erkaklar uchun maxsus joy ajratilganini targ‘ib qiluvchi qog‘ozlar yopishtirilgani tasvirlangan suratlarga munosabat bildirdi.
Ijtimoiy tarmoqlarda 43-sonli yo‘nalishdagi avtobus salonida ayollar va erkaklar uchun maxsus joy ajratilganini targ‘ib qiluvchi e’lon joylashtirilgani aks etgan tanqidiy foto tarqaldi.
“Toshshahartransxizmat” AJning mas’ul xodimlari tomonidan tezkor tekshiruv o‘tkazilganda, ushbu holat “8-Avtobus saroyi” filiali tasarrufidagi, saroy raqami 433-bo‘lgan, Isuzu’da aniqlangan hamda avtobus salonidagi mazkur e’lon tezkorlik bilan olib tashlangan.
Qayd etilishicha, yuqoridagi kabi holatlarni bartaraf etish maqsadida, barcha avtobus haydovchilari va chiptachilari o‘rtasida navbatdan tashqari yo‘riqnomalar o‘tkazilgan. Shuningdek, avtobus salonida turli xildagi axborot materiallari tarqatilishining oldini olish, jamoat transportida e’lon qilinishi belgilanmagan maxsus posterlardan foydalanmaslik hamda ish faoliyati davomida haydovchi va chiptachilardan yanada hushyor holda ish yuritishlari yuzasidan tushuntirish ishlari olib borilgan.
Shu bilan birga, “Toshshahartransxizmat” aprel oyida Xitoydan olib kelingan gaz va elektrda harakatlanuvchi katta sig‘imli avtobuslarning 400 donasi 20-aprel kunidan boshlab, avtobus yo‘nalishlarida aholiga xizmat ko‘rsatish uchun biriktirilishini ma’lum qildi.
Xitoyning Yutong Bus Co Ltd kompaniyasi va “Toshshahartransxizmat” o‘rtasida tuzilgan shartnomaga asosan, 2023-yilning mart oyi yakuniga qadar Yutong avtobuslarining 1-partiyasi, ya’ni 110 dona avtobus va 150 dona elektrobus O‘zbekistonga yetkazib berilishi kutilayotgani to‘g‘risida xabar berilgandi.
Davlat rahbari 13-dekabr kuni Uchtepa tumani faollari bilan o‘tkazilgan yig‘ilishda bosh vazirga mart oyigacha Toshkentga 1 000 ta avtobus olib kelish bo‘yicha topshiriq berganini aytgandi. “Jamoat transportini isloh qilishimiz zarur. Yutuqlar bilan birga, kamchiliklarimiz ham juda ko‘p”, — degandi prezident.
Izoh (0)