Navoiy viloyatida tergov ishlarini yengillashtirib berishini aytib, 100 million so‘m so‘ragan ayol jinoyati ustida qo‘lga tushdi. Bu haqda “Zamon” dasturida xabar berildi.
Xabarga ko‘ra, 51 yoshli samarqandlik fuqaro giyohvand modda savdosi bilan shug‘ullangani aniqlanib, tergovga qadar surishtiruv ishlari ketayotgan vaqtda tanishi bo‘lgan ayoldan yordam so‘ragan. Ayol tergovchi bilan gaplashib ko‘rganini, 100 million so‘m evaziga uni javobgarlikdan ozod qilib berishni va oldindan 10 million so‘m, keyin esa qolganini olib kelishni tushuntirgan.
Aytilgan pulni bergan fuqaro unga nisbatan hech qanday yengillik berilmaganini ko‘rgan. Shu orada ayol unga yana 10 million olib kelishini, aks holda uzoq muddatga qamalib ketishini aytib, qo‘rqitgan.
Shundan so‘ng, u pullarni olayotgan vaqtda xodimlar tomonidan o‘tkazilgan tezkor tadbir davomida qo‘lga tushgan. Mazkur holat yuzasidan hozirda Jinoyat kodeksining 168-moddasi 1-qismi hamda 211-moddasi 1-qismi bilan jinoyat ishi qo‘zg‘atilib, surishtiruv harakatlari olib borilmoqda.
Izoh (0)