Bugun, 16-aprel kuni Toshkent shahar ichki ishlar bosh boshqarmasida “Konstitutsiya o‘zimizniki” targ‘ibot tadbiri bo‘lib o‘tdi. Bu haqda “Daryo” muxbiri xabar berdi. 

Tadbirda ichki ishlar organlari xodimlari, isteʼfodagi harbiy xizmatchilar, xizmat vaqtida halok bo‘lgan xodimlarning oila aʼzolari hamda sanʼat va madaniyat vakillari ishtirok etishdi. 

So‘zga chiqqan isteʼfodagi polkovnik o‘zining xizmat vaqtlarini yodga olib, bugungi kunda faoliyatini olib borayotgan yoshlarga zarur tavsiyalarni berdi. 

Shuningdek, marhum safdor Bahrom Ergashevning onasi Nasiba Ergasheva ham so‘zga chiqib, farzandining ish faoliyati haqida gapirdi. 

“O‘g‘lim 27 yoshda bo‘lgan. 4 yildan oshiq xizmat qildi. Yoshligidan “men forma kiyaman, harbiy xizmatchi bo‘laman deb aytardi. Bo‘ldi ham. Hozir ikki nafar farzandi bor, 2 va 4 yosh. Ularni kelgusida mamlakatimizga kerak bo‘lgan kadr qilib yetishtirishga harakat qilaman. Musibat vaqtimizda davlatimiz tomonidan katta yordamlar berildi. Hozir ham ular biz bilan”, — deydi u.

Bundan tashqari, tadbirda turli xil maxsus harbiy chiqishlar ham namoyish etildi. 

“Daryo” mazkur tadbirdan fotoreportaj tayyorladi.