Shvetsiyada 17-apreldan 11-mayga qadar “Avrora-23” harbiy mashg‘ulotlari o‘tkaziladi, ular so‘nggi 25 yildagi eng yirik mashg‘ulotlar bo‘ladi, deb xabar berildi mamlakat Qurolli kuchlari saytida.
“Ularda 26 mingga yaqin erkak va ayol harbiy xizmatchilar ishtirok etadi. Mashqlar havo, quruqlik va dengizda o‘tkaziladi. Harakatlar butun Shvetsiya bo‘ylab, lekin asosan Shvetsiyaning janubida, shuningdek, Gotland (Boltiq dengizidagi orol) va uning yonida amalga oshiriladi”, — deyiladi xabarda.
Bayonotda aytilishicha, mashg‘ulotlarga Shvetsiyadan tashqari boshqa davlatlar ham jalb etiladi, ammo qaysi davlatlar ekaniga aniqlik kiritilmagan.
Shuningdek, Yonhap nashri Janubiy Koreya AQSH va Yaponiya bilan Yapon dengizida raketaga qarshi qo‘shma mudofaa mashg‘ulotlari o‘tkazayotganini xabar qildi.
Mashg‘ulotlarda Aegis tizimi (kemalardagi ko‘p funksiyali jangovar axborot-boshqaruv tizimi) bilan jihozlangan uchta esminets qatnashmoqda: Janubiy Koreyaning ROKS Yulgok Yi I, Amerikaning USS Benfold va Yaponiyaning JS Atago esminetslari. Mashqlar doirasida harbiylarga ballistik raketa shaklidagi kompyuterda modellashtirilgan nishonni aniqlash va kuzatish tartibini ishlab chiqish vazifasi yuklatilgan.
Mashg‘ulotlar Shimoliy Koreyaning 13-aprel kungi ballistik raketa uchirishiga javob tariqasida o‘tkazilmoqda.