Germaniya hukumati mamlakatdagi so‘nggi uchta atom elektr stansiyasini ham yopdi. Bu haqda ZDF xabar bermoqda.

Bavariyadagi Isar 2 atom elektr stansiyasi, Baden-Vyurtembergdagi Neckarwestheim 2 va Quyi Saksoniyadagi Emsland stansiyalari tarmoqdan uzildi.

“Avariya yuz bergan taqdirda atom energetikasi bilan bog‘liq xavf-xatarlarni nazorat qilib bo‘lmaydi”, — dedi Germaniyaning Atrof-muhit va yadroviy xavfsizlik vaziri, “Alyans 90/Yashillar” partiyasi vakili Shteffi Lemke.

Parlamentdagi Sotsial-demokratik partiya fraksiyasi Twitter’da shunday post qoldirdi: “Atom energiyasi? Xayr!” O‘z navbatida, Germaniya erkin demokratik partiyasi (FDP) bosh kotibi Bijan Jir-Saray AESdan butunlay voz kechmaslikka chaqirdi.

Deutsche Welle nashrining qayd etishicha, 15-aprel kuni qator shaharlarda atom energetikasi muxoliflari AESlarning yopilishini kunbo‘yi mitinglar bilan nishonlagan. Stansiyalar yopilishiga qarshi odamlar ham ko‘chalarga chiqqan. Nashrning eslatishicha, YouGov instituti tomonidan o‘tkazilgan so‘rov natijalariga ko‘ra, nemislarning uchdan ikki qismi mamlakatdagi so‘nggi atom elektr stansiyalarining yopilishiga qarshi.

Yadro energiyasidan uzil-kesil voz kechish qarori Germaniyada 2011-yilda — Fukusima atom elektr stansiyasidagi halokatdan keyin qabul qilingan edi. Oxirgi stansiyalar 2022-yil oxirigacha yopilishi kerak edi, biroq Rossiyaning Ukrainaga keng ko‘lamli bosqini va undan kelib chiqqan energetika inqirozi tufayli AESlar faoliyatini to‘xtatish aprel oyiga ko‘chirildi.