Швецияда 17 апрелдан 11 майга қадар “Аврора-23” ҳарбий машғулотлари ўтказилади, улар сўнгги 25 йилдаги энг йирик машғулотлар бўлади, деб хабар берилди мамлакат Қуролли кучлари сайтида.
“Уларда 26 мингга яқин эркак ва аёл ҳарбий хизматчилар иштирок этади. Машқлар ҳаво, қуруқлик ва денгизда ўтказилади. Ҳаракатлар бутун Швеция бўйлаб, лекин асосан Швециянинг жанубида, шунингдек, Готланд (Болтиқ денгизидаги орол) ва унинг ёнида амалга оширилади”, — дейилади хабарда.
Баёнотда айтилишича, машғулотларга Швециядан ташқари бошқа давлатлар ҳам жалб этилади, аммо қайси давлатлар эканига аниқлик киритилмаган.
Шунингдек, Yonhap нашри Жанубий Корея АҚШ ва Япония билан Япон денгизида ракетага қарши қўшма мудофаа машғулотлари ўтказаётганини хабар қилди.
Машғулотларда Aegis тизими (кемалардаги кўп функцияли жанговар ахборот-бошқарув тизими) билан жиҳозланган учта эсминец қатнашмоқда: Жанубий Кореянинг ROKS Yulgok Yi I, Американинг USS Benfold ва Япониянинг JS Atago эсминецлари. Машқлар доирасида ҳарбийларга баллистик ракета шаклидаги компьютерда моделлаштирилган нишонни аниқлаш ва кузатиш тартибини ишлаб чиқиш вазифаси юклатилган.
Машғулотлар Шимолий Кореянинг 13 апрель кунги баллистик ракета учиришига жавоб тариқасида ўтказилмоқда.
Изоҳ (0)