Шимолий Корея етакчиси Ким Чен Ин ўзининг бобоси Ким Ир Сеннинг туғилган куни муносабати билан мамлакатнинг энг муҳим байрами саналган “Қуёш куни”да футбол ўйинига ташриф буюрди. Бу ҳақда Ла Пренса Латина хабар берди.
Маълум қилинишича, бу сафар ҳам КХДР етакчисига унинг тўққиз ёшли қизи Ким Чжу Э ҳамроҳлик қилган. У мамлакатнинг барча асосий тадбирларида доимий равишда отаси билан бирга кўриниш беради. Шу сабабли у диктаторнинг вориси сифатида қаралади.
Яқинда улар бирга “Хвасон-18” қитъалараро баллистик ракетасини синовдан ўтказиш маросимида қатнашганди. Бу сафар ота ва қиз КХДР пойтахтида Вазирлар Маҳкамаси ва Миллий мудофаа вазирлиги аъзолари ўртасида бўлиб ўтган футбол ўйинига борди. Суратда трибунада фақат ҳарбийлар бўлганини кўриш мумкин.
Ўйин “ҳаяжонли” пенальтилар сериясидан кейин Мудофаа вазирлигининг 5:3 ҳисобидаги ғалабаси билан якунланган. Кейин икки жамоа арқон тортиш ўйнаган ва Мудофаа вазирлиги яна ғалаба қозонган.
Ким Чжу Э Ким Чен Иннинг ягона фарзанди эмас. Жанубий Корея разведкаси маълумотларига кўра, КХДР етакчисининг уч фарзанди бор, тўнғич фарзанди эса ўғил. Кимнинг фарзандлари 2010, 2013 ва 2017 йилларда туғилгани тахмин қилинмоқда.
Ким Чен Иннинг меросхўри — Чжу Э ҳақида нималар маълум?
2022 йил ноябрида Шимолий Корея етакчиси Ким Чен Ин ўзининг қизи Чжу Эни дунёга биринчи марта кўрсатди. Бунгача КХДРнинг 38 ёшли етакчисининг ҳеч бир фарзанди оммага намойиш қилинмаган. Чжу Э мамлакатдаги энг йирик қитъалараро баллистик ракетани ишга тушириш жараёнида отаси ёнида кўриниш берган.
Вашингтондаги Стимсон марказининг Шимолий Корея бўйича эксперти Майкл Мадденнинг фикрича, Ким ўз қизини оммага олиб чиқиш орқали қизи ҳокимият давомчиси эканини кўрсатиши мумкин. Январь ойида Шимолий Корея етакчиси қизи билан қўшинлар ва қитъалараро баллистик ракетани текшириш давомида кўриниш берди. КХДР давлат ахборот агентлиги KCNA қизни Ким Чен Иннинг “энг севимли” ва “қимматли” фарзанди деб атади.
Айрим таҳлилчиларнинг фикрича, Ким Чен Ин эрта босқичда ҳокимиятнинг эҳтимолий меросхўри номини айтиб, отаси йўл қўйган хатодан қочишга ҳаракат қилмоқда.
Изоҳ (0)