Британия ҳарбий ҳаво кучлари 17 апрель куни Финляндия кўрфази ва Болтиқ денгизи узра НАТО ҳаво ҳудудига яқин масофада учаётган Россиянинг иккита қирувчи ва битта разведкачи самолётини тутиб олди. Бу ҳақда The Independent хабар берди.
Маълум қилинишича, Британия ва Германия ҳарбий-ҳаво кучларининг Eurofighter Typhoon қирувчи самолётлари НАТО чегарасининг шарқий қисмига, Эстония яқинига кўтарилган. Ҳавода Россиянинг Ил-20 разведка самолёти аниқланган, у Калининградга парвоз қилган. Унга иккита Su-27 Flanker-B қирувчи самолёти ҳамроҳлик қилган.
Операцияда қатнашган учувчилардан бирининг сўзларига кўра, қироллик ҳаво кучлари Болтиқ денгизи узра Россия самолётларини тез-тез учратади, шунинг учун ҳам авиатехникаларни тутиб қолиш одатий ҳолдир.
“Шунга қарамай, Россия самолётларини тутиб олишнинг аҳамияти ва НАТО ҳаво ҳудудини жамоавий мудофаа қилишга содиқлик ўзгаришсиз ва қатъий бўлиб қолмоқда. Авиатехникаларни тутиб олиш немис иттифоқчиларимиз билан тез ва қатъий ҳаракат қилишимиз мумкинлигини исботлади”, — дейди учувчи.
15 мартда ҳам Буюк Британия Қироллик ҳаво кучлари ва Германия қирувчи самолётлари Эстония ҳаво ҳудудида Россия самолётини биринчи қўшма операцияда тутиб олганди. Россия самолёти Эстония ҳаво ҳаракатини бошқариш хизматини огоҳлантирмагани қайд этилганди.
Изоҳ (0)