Toshkent viloyati Yuqori Chirchiq tumanida o‘zganing mashinasini olib qochgan 18 yoshli yigit ushlandi. Bu haqda “Vaziyat 24” dasturida ma’lum qilindi.
Qayd etilishicha, 5-aprel kuni soat 08:10 larda Yuqori Chirchiq tumani “Mirobod” mahallasida joylashgan “Toshkent ko‘priklaridan foydalanish” unitar korxonasining kirish darvozasi yaqiniga MCHJga tegishi bo‘lgan, Nexia-3 avtomobili kaliti ichida qoldirilgan holda joylashtirib ketilgan. Atrofdagi kuzatuv kameralaridan ko‘rish mumkinki, noma’lum shaxs mashinani minib, noma’lum tomonga yashiringan.
Kelib tushgan xabarga ko‘ra, darhol to‘sib ushlash tadbiri e’lon qilingan va mashinani olib qochgan shaxs qo‘lga olingan. Aniqlanishicha, ushbu jinoyatni Yuqori Chirchiq tumani “Taraqqiyot” mahallasida yashovchi, muqaddam sudlangan 18 yoshli yigit sodir etgan.
Holat yuzasidan Yuqori Chirchiq tumani IIB huzuridagi Tergov bo‘limi tomonidan Jinoyat kodeksining 267-moddasi (transport vositasini olib qochish) 1-qismi bilan jinoyat ishi qo‘zg‘atilib, hozirda dastlabki tergov harakatlari olib borilmoqda. Ushbu jinoyatni sodir etganlik uchun Jinoyat kodeksida 5 yildan 10 yilgacha ozodlikdan mahrum qilish bilan bog‘liq jazo qo‘llanilishi belgilangan.
Izoh (0)