Тошкент вилояти Юқори Чирчиқ туманида ўзганинг машинасини олиб қочган 18 ёшли йигит ушланди. Бу ҳақда “Вазият 24” дастурида маълум қилинди.
Қайд этилишича, 5 апрель куни соат 08:10 ларда Юқори Чирчиқ тумани “Миробод” маҳалласида жойлашган “Тошкент кўприкларидан фойдаланиш” унитар корхонасининг кириш дарвозаси яқинига МЧЖга тегиши бўлган, Nexia-3 автомобили калити ичида қолдирилган ҳолда жойлаштириб кетилган. Атрофдаги кузатув камераларидан кўриш мумкинки, номаълум шахс машинани миниб, номаълум томонга яширинган.
Келиб тушган хабарга кўра, дарҳол тўсиб ушлаш тадбири эълон қилинган ва машинани олиб қочган шахс қўлга олинган. Аниқланишича, ушбу жиноятни Юқори Чирчиқ тумани “Тараққиёт” маҳалласида яшовчи, муқаддам судланган 18 ёшли йигит содир этган.
Ҳолат юзасидан Юқори Чирчиқ тумани ИИБ ҳузуридаги Тергов бўлими томонидан Жиноят кодексининг 267-моддаси (транспорт воситасини олиб қочиш) 1-қисми билан жиноят иши қўзғатилиб, ҳозирда дастлабки тергов ҳаракатлари олиб борилмоқда. Ушбу жиноятни содир этганлик учун Жиноят кодексида 5 йилдан 10 йилгача озодликдан маҳрум қилиш билан боғлиқ жазо қўлланилиши белгиланган.
Изоҳ (0)