Surxondaryoda erkak o‘zganing Tiсo’sini olib qochdi. Endi u 10 yilgacha ozodlikdan mahrum qilinishi mumkin

Surxondaryoda mast holda o‘zganing mashinasini olib qochib YTHga uchragan erkakka nisbatan jinoyat ishi qo‘zg‘atilib, qamoqqa olindi.

IIV huzuridagi Tergov departamentining ma’lum qilishicha, olib qochilgan Tiсo mashinasi Muzrabot tumanida yashovchi 51 yoshli X.O‘.ga tegishli bo‘lgan. U 28-mart kuni soat 22:00 larda mashinani tanishining uyi oldida qarovsiz qoldirib ketganida nomaʼlum shaxs bundan foydalanib uni olib qochgani haqida xabar berib, transport vositasini olib qochgan shaxsga nisbatan qonuniy chora ko‘rishni so‘ragan.

Olib borilgan tergov-tezkor tadbirlari davomida, shu kunning o‘zida avtomashina Termiz shahar “Manguzar” YPX maskanidan harakatlanib ketayotgani aniqlangan. YPX xodimlari mashinani to‘xtatishni talab qilganida, nomaʼlum shaxs ulardan qochishga harakat qilayotganida boshqaruvni eplay olmay, YTHga uchragan. Shu vaqtda u IIB xodimlari tomonidan qo‘lga olingan.

Qonunbuzarning shaxsi tekshirilganda, u Jarqo‘rg‘on tumani “Obihayot” mahallasida yashovchi muqaddam sudlangan, spirtli ichimlik taʼsirida bo‘lgan 36 yoshli J.X. ekani aniqlangan.

Mazkur holat yuzasidan Angor tumani IIB huzuridagi Tergov guruhi tomonidan J.X.ga nisbatan Jinoyat kodeksning 267-moddasi 1-qismi (transport vositasini olib qochish) bilan jinoyat ishi qo‘zg‘atilib, unga nisbatan qamoqqa olish tarzdagi ehtiyot chorasi qo‘llanilgan.

Ushbu jinoyatni sodir etganlik uchun Jinoyat kodeksida 5 yildan 10 yilgacha ozodlikdan mahrum qilish bilan bog‘liq jazo qo‘llanilishi belgilangan.