Samarqand viloyati Bulung‘ur tumanida o‘zganing Spark avtomobilini minib qochgan shaxs qo‘lga olindi. Bu haqda viloyat IIB axborot xizmati xabar berdi.
Ma’lum qilinishicha, 5-aprel kuni soat 08:35 da Bulung‘ur tumani IIBga transport vositasi olib qochilgani to‘g‘risida ariza kelib tushgan. Aniqlanishicha, haydovchi o‘zining Spark avtomobili ichida kalitni qoldirgan holda uyiga kirib ketgan va ertasi kuni mashinasi joyida yo‘qligidan xabar topgan.
Holat yuzasidan Samarqand viloyati JXX YHXB xodimlari tomonidan olib borilgan surishtiruv ishlari natijasida minib qochilgan Spark topilgan. Mashinani olib qochgan gumonlanuvchi Jinoyat-protsessual kodeksining 221-moddasi tartibida ushlanib, unga nisbatan qamoqqa olish ehtiyot chorasi qo‘llangan.
“Spirtli ichimlik ichib, ortidan nos chekkanim sababli yo‘lda turgan o‘zganing mashinasiga o‘tirib, uni o‘zim bilmagan holda boshqarganman. Rulda uxlab qolganman. Keyin bir yaxshi inson kelib, meni uyg‘otib, uyimga olib borib tashlagan. Qilgan ishimdan pushaymonman”, — deydi gumonlanuvchi.
Bundan avval Buxoroda mast fuqaro tanishining Spark avtomobilini olib qochgani, Andijonda olib qochilgan Spark ikkita avtomobilga borib urilgani hamda Farg‘onada sobiq kuyov qaynonasining mashinasini olib qochgani haqida xabar berilgandi.
Izoh (0)