Namanganda 12-aprel kuni tadbirkorning uyidan 2 million dollar o‘g‘irlamoqchi bo‘lgan guruh ushlandi. Bu haqda Ichki ishlar vazirligi axborot xizmati xabar berdi.
Ma’lum bo‘lishicha, IIV Tezkor-qidiruv departamenti hamda DXX uyushgan jinoiy guruh Namangan viloyatida tadbirkorlik bilan shug‘ullanuvchi fuqaroning yashash xonadonidagi 2 million dollar pullarini bosqinchilik yo‘li bilan qo‘lga kiritishni rejalashtirayotgani yuzasidan tezkor ma’lumot olgan. Tezkor qidiruv departamenti Jinoyat-qidiruv xizmati Uyushgan jinoyatchilikka qarshi kurashish boshqarmasi, Toshkent shahar Ichki ishlar bosh boshqarmasi hamda DXX xodimlari tomonidan tezkor tadbir o‘tkazilgan.
Olmazor tumanida o‘tkazilgan tezkor tadbirda jinoiy guruh a’zosi — 1979-yilda tug‘ilgan, muqaddam Jinoyat kodeksining 8 ta moddasi bilan sudlangan shaxs qo‘lga olinib, uning yonidan maxsus tayyorlab qo‘yilgan 2 dona pichoq, skotch, Ichki ishlar organlari xodimlarining dala formalari, rezina qo‘lqop, 0,7 gramm opiy giyohvandlik moddasi, “Tramadol” tabletkasi va sport sumkasi daliliy ashyo sifatida rasmiylashtirib olingan.
Shu kunning o‘zida tezkor tadbir davom ettirilib, guruhning qolgan 4 nafar a’zosi Namangan viloyati Ichki ishlar boshqarmasi tezkor-qidiruv xizmati xodimlari tomonidan qo‘lga olindi. Ulardan jinoyatni sodir etishda foydalanish uchun tayyorlab qo‘yilgan sport kiyimlari, niqob va qo‘lqoplar 3 dona pichoq, elektroshok qurilmasi, telefon apparatlari, giyohvandlik moddasi va boshqa jihozlar topilgan.
Tezkor surishtiruv tadbirlari davomida bosqinchilik jinoyatini sodir etish uchun yana besh nafar shaxslar taklif etilgani aniqlanib, ushlandi. Qo‘lga olingan shaxslarning asosiy qismi muqaddam sudlangan shaxslar yoki tadbirkor va sportchilar bo‘lib, ularning aksariyati bosqinchilik rejalashtirilgan fuqaro bilan tanish bo‘lgan va hatto u bilan birga ishlab kelgan.
Holat yuzasidan Toshkent shahar Ichki ishlar bosh boshqarmasi huzuridagi tergov bo‘limi tomonidan Jinoyat kodeksining 164-moddasi 2-qismi bilan jinoyat ishi qo‘zg‘atilib, 10 nafar shasxga nisbatan qamoq ehtiyot chorasi qo‘llangan. Hozirda tergov harakatlari olib borilmoqda.
Izoh (0)