Buxoro viloyati Kogon tumanida poyezd Lacetti mashinasini urib yuborgani haqida xabarlar tarqaldi. Viloyat Ichki ishlar boshqarmasi mazkur xabar yuzasidan maʼlumot berdi. 

Unga ko‘ra, 13-aprel kuni soat 15:15 larda Buxoro viloyati Transportda Xavfsizlikni taʼminlash boshqarmasi hamda viloyat IIB ning 102 avtomatlashtirilgan tizimiga ushbu holat yuzasidan xabar tushgan. Aniqlanishicha, holat shu kuni soat 14:00 larda Buxoro—Xo‘jadavlat yo‘nalishining 5975-kilometrida sodir bo‘lgan. PCH-10 korxonasiga tegishli MPT-930 motovoz mashinasini boshqarib kelayotgan X.Y. ismli fuqaro Buxoro—Poykent yo‘nalishi bo‘yicha harakatlanayotganda qo‘riqlanmaydigan temiryo‘l kesishmasidan o‘tayotgan Navoiy viloyati Qiziltepa tumanida yashovchi A.A. ismli shaxs boshqaruvida bo‘lgan Lacettiʼni o‘ng tomonidan urib yuborishi natijasida yo‘l-transport hodisasi sodir bo‘lgan.

Mazkur hodisada Lacetti haydovchisi A.A. bosh miyaga qon quyilishi, ko‘krak qafasi jarohati, o‘ng o‘pka yorilishi tashxisi bilan tibbiy muassasada davolanmoqda. Holat yuzasidan tergovga qadar tekshiruv harakatlari olib borilmoqda.