Andijon viloyati Shahrixon tumanida 13-aprel kuni fuqarolar va ichki ishlar xodimi o‘rtasida mushtlashuv sodir bo‘ldi. Viloyat Ichki ishlar boshqarmasi holat yuzasidan munosabat bildirdi.
Ma’lum qilinishicha, inspektor-psixolog mayor S.Kamolitdinov “Eshonqishloq” mahallasida xizmat olib borayotgan vaqtida hududdan 2004-yilda tug‘ilgan fuqaro Sh.Sh. boshqaruvidagi Labo yo‘l harakati qoidalarini qo‘pol ravishda buzib harakatlangan.
Bundan tashqari, mashina yukxonasida ikki nafar voyaga yetmagan bolalar olib ketilayotgani ko‘rib aniqlangan. Inspektor shu sababli mashinani to‘xtatishga harakat qilgan. Avtomashina haydovchisi bolalar yukxonadan tushib qolishi bilan voqea joyidan yashiringan.
Shundan so‘ng holatni rasmiylashtirish maqsadida mayor S.Kamolitdinov va hudud profilaktika inspektori kapitan D.Qosimov “Quruqsoy” mahallasidagi huquq-tartibot maskaniga kelgan. U yerga haydovchi, uning akasi va tanishi kelib, xodimlarning harakatiga keskin qarshilik ko‘rsatgan va ularni haqorat qilib, tan jarohati yetkazgan.
Tibbiy xulosaga ko‘ra, mayor S.Kamolitdinovga “bosh yumshoq to‘qimalarining lat yeyishi, chap yelka ichki yuzasi yumshoq to‘qimalari lat yeyishi, ko‘karishi, milk yumshoq to‘qimalarining lat yeyishi” tashxisi qo‘yilib, fuqaro B.Sh.da “bo‘yin old qismida shilinma jarohati” mavjudligi aniqlangan. Labo haydovchisiga nisbatan Ma’muriy javobgarlik to‘g‘risidagi kodeksning 128-moddasi bilan ma’muriy bayonnoma rasmiylashtirilgan.
Voqea ishtirokchilari Sh.Sh., B.Sh. va J.B.ga nisbatan yuqoridagi kodeksning 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) hamda Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan hujjatlar rasmiylashtirilib, prokuratura organlari tomonidan tergovga qadar tekshiruv harakatlari olib borilmoqda. Shuningdek, xodimlarning harakatlariga huquqiy baho berish maqsadida xizmat tekshiruvi tayinlangan.
Izoh (0)