Наманганда 12 апрель куни тадбиркорнинг уйидан 2 миллион доллар ўғирламоқчи бўлган гуруҳ ушланди. Бу ҳақда Ички ишлар вазирлиги ахборот хизмати хабар берди.
Маълум бўлишича, ИИВ Тезкор-қидирув департаменти ҳамда ДХХ уюшган жиноий гуруҳ Наманган вилоятида тадбиркорлик билан шуғулланувчи фуқаронинг яшаш хонадонидаги 2 миллион доллар пулларини босқинчилик йўли билан қўлга киритишни режалаштираётгани юзасидан тезкор маълумот олган. Тезкор қидирув департаменти Жиноят-қидирув хизмати Уюшган жиноятчиликка қарши курашиш бошқармаси, Тошкент шаҳар Ички ишлар бош бошқармаси ҳамда ДХХ ходимлари томонидан тезкор тадбир ўтказилган.
Олмазор туманида ўтказилган тезкор тадбирда жиноий гуруҳ аъзоси — 1979 йилда туғилган, муқаддам Жиноят кодексининг 8 та моддаси билан судланган шахс қўлга олиниб, унинг ёнидан махсус тайёрлаб қўйилган 2 дона пичоқ, скотч, Ички ишлар органлари ходимларининг дала формалари, резина қўлқоп, 0,7 грамм опий гиёҳвандлик моддаси, “Трамадол” таблеткаси ва спорт сумкаси далилий ашё сифатида расмийлаштириб олинган.
Шу куннинг ўзида тезкор тадбир давом эттирилиб, гуруҳнинг қолган 4 нафар аъзоси Наманган вилояти Ички ишлар бошқармаси тезкор-қидирув хизмати ходимлари томонидан қўлга олинди. Улардан жиноятни содир этишда фойдаланиш учун тайёрлаб қўйилган спорт кийимлари, ниқоб ва қўлқоплар 3 дона пичоқ, электрошок қурилмаси, телефон аппаратлари, гиёҳвандлик моддаси ва бошқа жиҳозлар топилган.
Тезкор суриштирув тадбирлари давомида босқинчилик жиноятини содир этиш учун яна беш нафар шахслар таклиф этилгани аниқланиб, ушланди. Қўлга олинган шахсларнинг асосий қисми муқаддам судланган шахслар ёки тадбиркор ва спортчилар бўлиб, уларнинг аксарияти босқинчилик режалаштирилган фуқаро билан таниш бўлган ва ҳатто у билан бирга ишлаб келган.
Ҳолат юзасидан Тошкент шаҳар Ички ишлар бош бошқармаси ҳузуридаги тергов бўлими томонидан Жиноят кодексининг 164-моддаси 2-қисми билан жиноят иши қўзғатилиб, 10 нафар шасхга нисбатан қамоқ эҳтиёт чораси қўлланган. Ҳозирда тергов ҳаракатлари олиб борилмоқда.
Изоҳ (0)