Jons Hopkins universiteti ma’lumotlariga ko‘ra, AQShda COVID-19 qurbonlarining soni mamlakatda 1918—1919-yillarda tarqalgan ispan grippi tufayli vafot etganlar sonidan oshib ketdi. Ispan grippi pandemiyasi Amerika va jahon yaqin tarixidagi eng jiddiysi hisoblanardi.
AQSh Kasalliklarni nazorat qilish va oldini olish markazi (CDC) ma’lumotlariga ko‘ra, AQShda 675 mingga yaqin odam ispan grippi qurboniga aylangan. COVID-19 dan o‘lim bo‘yicha statistik ma’lumotlar esa allaqachon bu raqamlardan oshib ketdi — Hopkins universiteti ma’lumotlariga ko‘ra, AQShda 676 ming kishi koronavirus oqibatida vafot etgan.
Ispan grippi bilan kasallanishning birinchi holatlari AQShda 1918-yilning bahorida harbiy xizmatchilar orasida qayd etilgan. Ushbu kasallikni Yevropaga birinchi jahon urushida qatnashish uchun kelgan harbiylar olib kelgan, deb hisoblaniladi. Shundan keyin kasallik butun Afrika, Hindistonga tarqalib, Rossiya imperiyasiga yetib kelgan. Pandemiya 1919-yilning bahorida zaiflasha boshlagan.
Turli manbalarga ko‘ra, ispan grippi bilan 500 dan 600 milliongacha odam kasallangan, deyiladi “Rospotrebnadzor” saytida. Bu ko‘rsatkich o‘sha paytda Yer aholisining 25—30 foizini tashkil qilardi. Pandemiyada 50 dan 100 milliongacha odam vafot etgan. Muassasa ushbu pandemiyani butun insoniyat tarixidagi eng keng tarqalgani deb ataydi.
Jons Hopkins universiteti ma’lumotlariga ko‘ra, 2019-yil oxiridan buyon dunyoda 229 million odamga koronavirus tashxisi qo‘yildi, shulardan 4,69 million kishi vafot etdi. AQSh infeksiyaga chalinganlar va undan vafot etganlar soni bo‘yicha dunyoda birinchi o‘rinda turadi (mamlakatda 42,2 million kishida kasallik qayd etilgan). Ikkinchi o‘rinda Hindiston (33,47 mln kishi kasallangan, 445,1 ming kishi vafot etgan), uchinchi o‘rinda Buyuk Britaniya (7,5 mln kishi kasallangan, 135,5 ming kishi vafot etgan) turadi. Eron va Braziliya kuchli beshlikni yakunlaydi.
Avgust oyining boshida AQShda delta shtammi tufayli koronavirus tarqalishi keskin tezlashgani ma’lum qilindi. CDC vakillari, agar fuqarolarning ko‘pchiligi emlanmasa, kasallanish va kasalxonaga yotqizishlar soni oshishi haqida ogohlantirdi. Ularning so‘zlariga ko‘ra, bunday holatda kunlik kasallanishlar soni bir necha yuz minglab kishini tashkil qilishi mumkin.
Izoh (0)