Toshkent shahriga Xitoydan 233 ta avtobus va elektrobuslar olib kelindi. May oyigacha yana 767 ta shu turdagi transport vositalari keltiriladi. Bu shaharda harakatlanayotgan avtobuslardagi tiqilinchni kamaytiradimi? Avtobuslar oraqliq intervali qisqaradimi? “Toshshahartransxizmat” AJ boshqaruv raisi Anvar Jo‘rayev “Daryo” muxbiri bilan suhbatda ushbu savollarga javob berdi.
“Mingtadan 300 tasi elektrobus”
Xitoyning Kingvong zavodidan 18 metrli tabiiy gazda harakatlanadigan avtobuslar (200 ta), Yutong kompaniyasidan 500 ta gazda yuradigan avtobus va 300 ta elektrobus keltirilmoqda.
Barcha avtobuslar texnik shartlariga yo‘lovchilar oqimini sanash moslamasi, xavfsizlik uchun videokamera o‘rnatilgan. Salonida yo‘lovchilarga qulaylik yaratish maqsadida ekranlar ham mavjud. Monitorda oraliqlar, bekatlar eʼlon qilib boriladi. Mingta yangi avtobus 167 ta yo‘nalishda harakatlanadi.
.jpg)
“Oraliq interval kamayadi”
Hozirda avtobuslarda kuniga 670 ming yo‘lovchi tashiyapmiz. Kelayotgan yangi avtobuslar bilan qo‘shib hisoblaganda kuniga 1 800 ta avtobusni harakatga chiqarish rejalashtirilgan.
Bugungi kunda oraliq intervallarimiz 20 daqiqani tashkil qilayotgan bo‘lsa, yangi avtobuslar to‘liq ishga tushsa, yo‘lovchi eng ko‘p bo‘lgan yo‘nalishlarda interval 4-5 daqiqa bo‘ladi. Xalqa, yetkazib beruvchi va bog‘lovchi yo‘nalishlarda esa oraqliq interval 6-7 daqiqani tashkil etadi. Jamoat transportida jozibardorlik oshgani hisobiga yo‘lovchilar soni bir million nafarga yetishi ko‘zda tutilmoqda. Bu 1,5 baravar o‘sish degani.
“Yangi tariflarga o‘tamiz”
May oyidan yangicha tariflar tizimi joriy qilinadi. Elektron va naqd to‘lovlar o‘rtasida tafovut bo‘ladi. Bunda birinchi to‘lov 1 400 so‘m, ikkinchi avtobusga o‘tilganda 600 so‘m, uchinchi va to‘rtinchisida bir soat ichida tekin bo‘ladi. Avtobusdan metroga o‘tganda to‘lov ming so‘m bo‘ladi. Bu ham yo‘lovchilarni jamoat transportiga jalb qilishda yangi mexanizm.
Bu tizimda faqatgina transport karta va elektron to‘lovdan foydalanganda chegirma beriladi. Naqd pul bo‘lsa, chegirma o‘tmaydi. Aytish kerakki, bu butun dunyo tajribasidir. Biz elektron to‘lov tizimiga o‘tsak, shaffoflik bo‘ladi.
Izoh (0)