Qashqadaryo viloyatining Qarshi shahridagi xonadonda bosqinchilik sodir etib, oila boshini vahshiylarcha o‘ldirgan maktab bitiruvchisi 12 yil muddatga ozodlikdan mahrum qilindi. Bu haqda Zo‘rTV kanalining ''Jinoyat izi'' ko‘rsatuvida maʼlum qilindi.
Aniqlanishicha, Qarshi shahridagi maktab o‘quvchisi 2022-yilning 31-may kuni “Komilon” mahalla fuqarolar yig‘inida yashovchi fuqaroni bolg‘a bilan ayovsiz urib, o‘ldirgan. So‘ngra marhumning turmush o‘rtog‘i va bolalari yotgan xonaga pichoq olib kirib, dastlab marhumning xotinini, so‘ngra 2,5 yoshli o‘g‘lini pichoqlaydi. Ona-bolani o‘ldirdim deb o‘ylab, marhumning onasi yotgan xonaga kiradi.
Namozga uyg‘ongan ammasi bilan suhbatlashib, o‘qishga ketayotganini aytib, taksi chaqirib berishini so‘raydi. Ammasi unga yo‘lkira berish uchun o‘rnidan turib, o‘girilganida uning ham boshiga urib, o‘ldirishga harakat qiladi. Ammasi hushidan ketgach, hovliga chiqadi va marhum 27 yoshli erkakning avtomobilini minib, maktabiga ketadi.
Sudya Botirali Diyorovning maʼlumot berishicha, sud 2022-yilning 20-oktabr kuni sudlanuvchi ishini ko‘rib chiqib, uni qasddan odam o‘ldirish, ikki va undan ortiq shaxsni qasddan o‘ldirishga suiqasd qilish va bosqinchilik jinoyatlarini sodir etganlikda aybli deb topgan. Sud sudlanuvchining voyaga yetmagani, maktab o‘quvchisi ekani va qilmishidan chin ko‘ngildan pushaymonligini hisobga olib, uni 12 yil muddatga ozodlikdan mahrum qilgan.
Eslatib o‘tamiz, avvalroq qotillikda gumonlanib qo‘lga olingan o‘quvchi Qarshi shahridagi 27-maktabning 11-sinf bitiruvchisi ekani, janoza paytida qo‘lga olingani maʼlum bo‘lgandi.
Izoh (1)
Qarindosh ekanmj