Namangan shahar Ichki ishlar organlari faoliyatini muvofiqlashtirish boshqarmasi xodimi viloyat IIB rahbariyatiga murojaat qilib, unga pora taklif etayotganlarga qonuniy chora ko‘rishni so‘ragan. Bu haqda “Daryo” muxbiri Azizbek Abduvaliyev xabar bermoqda.
Maʼlum bo‘lishicha, joriy yil 23-yanvar kuni Namangan shahrida yashovchi fuqaro 153 million so‘mlik tamaki mahsulotlarini noqonuniy ravishda muomalaga kiritayotgan vaqtda ushlangan. Unga nisbatan jinoyat ishi qo‘zg‘atilib, qamoqqa olish ehtiyot chorasi qo‘llangan.
Mazkur jinoyat ishi bo‘yicha ayblanuvchining tanishi uni qamoqdan chiqarib berish evaziga IIB masʼul xodimiga 20 ming AQSH dollari miqdorida pora taklif qilgan.
Xodimning murojaatiga asosan joriy yil 6-aprel kuni IIV Shaxsiy xavfsizlik bosh boshqarmasi Namangan viloyat bo‘yicha boshqarmasi tomonidan tezkor tadbir o‘tkazildi. Tadbir davomida murojaatda nomi keltirilgan shaxs xodimga taklif qilingan summadan 5000 dollarini pora sifatida berayotgan vaqtda qo‘lga olinib, tegishli tartibda protsessual hujjatlar rasmiylashtirildi.
Hozirda mazkur holat yuzasidan tergov harakatlari olib borilmoqda.
Izoh (0)