O‘zbekistonda ish haftasining ikkinchi yarmi juda iliq bo‘ladi. Bu haqda “O‘zgidromet” matbuot xizmati xabar berdi.
Ma’lum qilinishicha, 10-apreldan atmosfera fronti o‘tishida markaziy va sharqiy hududlar bo‘yicha yomg‘ir yog‘adi, Toshkent viloyatida va Farg‘ona vodiysi viloyatlarida baʼzi joylarda kuchli bo‘ladi, ayrim joylarda do‘l yog‘ishi mumkin.
Respublika bo‘yicha baʼzi joylarda shamol 15-20 metr/soniyagacha kuchayadi, baʼzida esa 22-25 metr/soniyaga yetadi. Kunduzgi havo harorati 15-20 darajani tashkil etadi.
11-aprel kunidan boshlab O‘zbekiston hududiga Turkmaniston orqali Eron hududlaridan juda iliq va quruq havo massasi kirib keladi. Respublika bo‘yicha asosan yog‘ingarchiliksiz ob-havo bo‘lishi kutilmoqda, faqat Qoraqalpog‘iston Respublikasi va Horazm viloyatida 14-aprelda baʼzi joylarda yomg‘ir yog‘ishi, momaqaldiroq bo‘lishi mumkin. Kunduzgi havo harorati ko‘tariladi va ish haftasining oxiriga kelib, 29-32 darajani tashkil etadi, shimolda, janubda va cho‘l hududlarda 35-37 darajagacha bo‘ladi.
Respublika bo‘yicha baʼzi joylarda 11–14-aprel kunlari shamol tezligi 15-20 metr/soniyagacha kuchayishi mumkin.
Respublikaning tog‘oldi va tog‘li hududlarida 10–11-aprel kunlari vaqti-vaqti bilan yomg‘ir yog‘adi, baʼzi joylarda kuchli bo‘ladi. Baland tog‘larda (2 000 metrdan yuqorida) yomg‘ir qorga aylanishi mumkin.
10–11-aprelda tog‘oldi va tog‘li hududlarda sel-suv toshqin hodisalari yuzaga kelishi mumkin. Shuningdek, ushbu kunlarda Toshkent viloyatining tog‘li hududlarida qor ko‘chishi xavfi bor.
Toshkent shahrida esa 10-aprel kuni vaqti-vaqti bilan yomg‘ir yog‘adi, momaqaldiroq bo‘lishi, do‘l yog‘ishi mumkin. Shamol g‘arbdan 5-10 metr/soniya tezlikda esadi, momaqaldiroq paytida 12-17 metr/soniyagacha kuchayishi mumkin. 11–14-aprelda yog‘ingarchilik kutilmaydi.
12-aprel kunidan boshlab havo jadal isiy boshlaydi. Dushanba va seshanba kunlari kunduzgi havo harorati 16-19 daraja, juma kuniga kelib, 30-32 daraja atrofida bo‘ladi.
Izoh (0)