O‘zbekistonda norasmiy bandlik holati tahlil qilindi. Bu haqda makroiqtisodiy va hududiy tadqiqotlar instituti xabar berdi.
Kambag‘allikni qisqartirish va bandlik vazirligi ma’lumotlariga ko‘ra, 2022-yilda jami iqtisodiy faol aholi 14,98 million kishini tashkil qilgan. Undan jami 13,7 million kishi ish bilan band bo‘lib, ularning 6,5 million (47 foiz) qismi rasmiy sektorda.
Iqtisodiy faol aholi bu iqtisodiyotda band bo‘lganlar va ishsizlarni o‘z ichiga oladi. Bunga talabalar, bola parvarishi bilan dekret ta’tilida o‘tirganlar va o‘z xohishiga ko‘ra ishlamaydiganlar kirmaydi.
Iqtisodiy faoliyat turlari bo‘yicha jami norasmiy sektorda band bo‘lganlarning eng katta ulushi ya’ni 34 foizi qishloq, o‘rmon va baliq xo‘jaligida mehnat qiladi. Xuddi shu ko‘rsatkich savdoda 14 foiz, qurilishda 14 foiz va sanoatda 11 foizni tashkil etadi.
Norasmiy bandlar — bu yuridik shaxs maqomiga ega bo‘lmagan korxonalarda ishlaydigan ishchilar. Ushbu toifaga mehnat munosabatlarini ro‘yxatdan o‘tkazmasdan ishlaydigan xufyona sektor vakillaridan tashqari, ro‘yxatdan o‘tmagan yakka tartibdagi tadbirkorlar, o‘z-o‘zini band qilganlar va ularning ishchilari kiradi.
Ta’kidlanishicha, norasmiy sektorning kattaligi hukumatlarga iqtisodiy siyosatni samarali amalga oshirish va iqtisodiyotni tartibga solishda qiyinchilik tug‘diradi.
Norasmiy sektorda bandlar sohalar kesimida rasmiy sektorda bandlar bilan bir xil miqdorda ish haqi oladi deb faraz qilinsa 2022-yilning o‘zida 9 milliondan oshiq aholi norasmiy sektorda band bo‘lgani hisobiga davlat budjetiga soliq ko‘rinishida 32,9 trillion so‘m mablag‘ tushmagan.
Budjet mablag‘larining yarmidan ko‘pi ijtimoiy sohaga yo‘naltirilishi inobatga olinsa bu mablag‘ hisobiga:
- 500 o‘quv o‘rinli 4 100 ta umumta’lim maktablari qurish yoki barcha hududlardagi ta’lim oluvchilarni sifatli ta’lim bilan qamrab olish uchun mavjud 10 522 ta umumta’lim maktablarini moddiy-texnik bazasini zamonaviy o‘quv anjomlari bilan ta’minlash;
- 3 737 ta ambulator tibbiy muassasa qurish;
- sog‘liqni saqlash tizimidagi tibbiy xodimlar oylik maoshini 7,8 million so‘mga yetkazish;
- umumta’lim maktablari o‘qituvchilarining oylik maoshini 7,2 million so‘mga yetkazish mumkin bo‘lardi.
Ya’ni tegishli soliqlarni to‘lamasdan biroz ko‘proq daromad olish orqali “yutish” bevosita boshqa ijtimoiy xizmatlardan foydalanishdagi “yutqazish”ga olib kelmoqda.
So‘nggi yillarda O‘zbekistonda norasmiy sektorda band bo‘lganlar soni ma’lum darajada pasaygan. Norasmiy bandlar ulushi 2020-yilda 43 foizdan 2022-yilda 40 foizga kamaygan.
Tegishli ravishda, ijtimoiy sohadagi muammolarni hal qilishda norasmiy iqtisodiyotni rasmiylashtirish va rasmiy biznesning o‘sishini qo‘llab-quvvatlash choralarini izchil davom ettirish muhim ahamiyat kasb etadi.
Bunda Germaniyaning mini jobs, Belgiyaning service voucher tashabbuslariga o‘xshagan samarali va hududiy o‘ziga xosliklarni inobatga olgan innovatsion mexanizmlarni joriy etish ayniqsa muhim.
Avvalroq Jahon banki O‘zbekistonda xususiy sektorning yutuq va kamchiliklarini tahlil qilgani haqida xabar berilgan edi.
Izoh (0)