Amerikaning Forbes jurnali dunyodagi eng boy odamlarning 37-reytingini taqdim etdi. Birinchi marta ro‘yxatni LVMH guruhi rahbari Bernard Arno boshqarib, reytingdagi yetakchilikni Ilon Maskdan tortib oldi.
“Daryo” dunyodagi eng boy odamning kompaniyasi, uning Forbes reytingidagi o‘sish ko‘rsatkichlari, brendlarining siri va merosi haqida so‘z yuritadi.
Bernard Arno xoldingi
Arnoning ismi LVMH’ga tegishli brendlar kabi keng jamoatchilikka unchalik ma’lum emas. Unga tegishli brendlar — Louis Vuitton, Christian Dior, Tiffany, Sephora, Givenchy, Mark Jacobs va boshqalar.
Bernard Arno LVMH boshqaruvini qo‘lga olganidan so‘ng, o‘ttiz yil ichida kompaniyani butun dunyo bo‘ylab 70 dan ortiq brendlar va sodiq mijozlarga ega bo‘lgan eng yirik mashhur mahsulotlar kompaniyasiga aylantirdi.
Qimmatbaho xaridlar tufayli kompaniya daromadi 1989-yildagi 4 milliard dollardan 2022-yilda 86 milliard dollargacha o‘sdi.
O‘tgan yil davomida LVMH aksiyalari 35 foizga oshdi. Bu so‘nggi 12 oy ichida Arnoning boyligini 53 milliard dollarga oshirdi — bu yilgi milliarderlar orasida eng katta ko‘rsatkich.
Milliarderlar reytingidagi o‘rni qanday o‘zgargan?
Fransiyalik magnat birinchi marta Forbes milliarderlar ro‘yxatiga 1997-yilda kirgan, o‘shanda uning boyligi 3,6 milliard dollar edi.
U tezda muvaffaqiyatga erishib, 2005-yilda dunyodagi eng boy yigirma kishidan biriga aylangan (sof boyligi 17 milliard dollar). Keyin esa 2011-yilda ro‘yxatda to‘rtinchi o‘ringa ko‘tarilgan (sof boyligi 41 milliard dollar).
2018-yilda Arnoning boyligi keskin o‘sgan — 41,5 milliard dollardan 71 milliard dollargacha. Shundan so‘ng, u reytingda to‘rtinchi o‘ringa chiqqan.
Oxirgi uch yil davomida u Forbes reytingida uchinchi o‘rinni egallab, o‘tgan yili yetakchilikni Mask va Amazon asoschisi Jeff Bezosga boy berib qo‘ygan edi.
Ta’kidlanishicha, Bernard Arno hashamatli klassik buyumlarni jozibador saqlash formulasini aniq o‘zlashtirgan.
Brendlarining muvaffaqiyat siri
Nega Louis Vuitton va Dior kabi brendlar shunchalik muvaffaqiyatli? Ular bir-biriga zid bo‘lgan ikkita xususiyatga: abadiylik va zamonaviylikning cho‘qqisiga ega, — degan edi Arno 2019-yilda.
2000 dollarlik sumkalar, shuningdek, soatlar, zargarlik buyumlari va kiyim-kechaklarni sotuvchi Louis Vuitton uyi o‘tgan yili 21,7 milliard dollar (20 milliard yevro) ishlab topgan.
Uning yangi dizaynerlar va brendlarni jalb qilish harakati LVMH’ga ustunlik beradi. 2017-yilda pop-yulduz Rianna bilan hamkorlikda ishga tushirilgan Fenty Beauty liniyasi 2019-yilda daromadini 550 million dollargacha oshirgan. Kompaniya ma’lumotlariga ko‘ra, o‘tgan yilgi daromad oshkor etilmagan miqdordan ikki baravar oshirilgan.
Albatta, xolding tarixida yomon kunlar ham bo‘lgan. 2019-yilga kelib Rianna bilan ishga tushirilgan Fenty premium kiyim-kechak liniyasi omma tomonidan tan olinmagan: 2021-yil fevralida kompaniya hamkorlikni to‘xtatayotganini e’lon qilgan.
Meros
Muvaffaqiyat cho‘qqisida bo‘lgan Arno meros haqida qarorlar qabul qilish arafasida. 2022-yil iyul oyida u LVMH aksiyalarining asosiy qismiga egalik qiluvchi Agache oilaviy xolding kompaniyasidan u yerda yuqori lavozimlarda ishlaydigan besh nafar farzandiga teng ulushlar berish uchun qayta tashkil etishni taklif qilgan.
Shuningdek, 2023-yil yanvar oyida u 47 yoshli qizi Delfinni kompaniyaning ikkinchi yirik brendi bo‘lgan Dior’ga rahbar etib tayinlagan.
Avvalroq italiyalik 18 yoshli yigit dunyodagi eng yosh milliarderga aylangani haqida xabar berilgandi.
Izoh (0)