Toshkent markazidagi “Aloqabank” bosh ofisi va Raqamli texnologiyalar vazirligiga tegishli ofis binolari auksionda umumiy 387 mlrd so‘mga sotildi. Ma’lumotlar “E-auksion” portalida e’lon qilingan.
Ikkala binolar ham Black Gold Industry News tomonidan 4-aprel kuni o‘tkazilgan savdolarda sotib olingan.
“Aloqabank” bosh ofisi 302 mlrd so‘mlik boshlang‘ich narx bilan kimoshdi savdosiga qo‘yilgan edi. Black Gold Industry News kompaniyasi savdolarda 317,1 mlrd so‘m taklif bergan va auksion g‘olibi bo‘lgan.
Raqamli texnologiyalar vazirligiga tegishli bino ijarasi esa 66,5 mlrd so‘mlik boshlang‘ich narx bilan auksionga chiqarilgan edi. Black Gold Industry News bu safar 69,9 mlrd so‘m narx bilan bino ijarasini sotib olgan.
Black Gold Industry News 2022-yilning 31-yanvarida tashkil qilingan kompaniya bo‘lib, rasman tog‘-kon sanoatida faoliyat yuritadi.
Kompaniyaning ustav fondi 8 mln so‘m va Samarqand shahrida ro‘yxatdan o‘tgan. Yagona ta’sischisi sifatida Ziyodulla Jalolov ko‘rsatilgan.
Yagona korporativ axborot portalida ma’lum qilinishicha, “Aloqabank” 2023-yil 3-aprel kuni Black Gold Industry News’ga ko‘chmas mulk va asosiy vositalar sotib olish uchun 180 oyga, yillik 14 foizlik 390 mlrd so‘m miqdorida kredit ajratgan.
Izoh (0)