Apple ham xodimlarini qisqartiradi

Apple Amerikaning boshqa texnologik gigantlari kabi o‘z xodimlarini qisqartiradi. Bu haqda AppleInsider xabar bermoqda. 

Qisqartirishlar korporativ chakana savdo bo‘limi xodimlariga ta’sir qiladi. Ular ish faoliyatini optimallashtirish maqsadida kompaniya tomonidan rejalashtirilgan qayta qurish tufayli yuzaga keladi.

Silikon vodiysi pandemiya davrida haddan tashqari ko‘p ishga yollanganligi sababli Facebook, Amazon, Google, Microsoft va boshqa kompaniyalarda katta ko‘lamli ishdan bo‘shatishlar sodir bo‘ldi. 

Apple shu kungacha ommaviy ishdan bo‘shatishning oldini olishga muvaffaq bo‘lgandi, biroq endi kompaniya ortiqcha yoki keraksiz lavozimlarni yo‘q qilmoqchi. 

Bloomberg ma’lumotlariga ko‘ra, Apple korporativ chakana savdo jamoalari navbatdagi qayta tuzilishga duch kelishmoqda.

Kompaniya ishdan bo'shatiladigan xodimlarning aniq sonini ma’lum qilmagan. Ushbu yangilik anonim manbalar tomonidan tasdiqlandi, Apple kompaniyasining o‘zi esa hali rasman hech narsa e’lon qilmagan. 

Manbalarga ko‘ra, Apple o‘z lavozimidan bo‘shatilgan barcha xodimlarni qo‘llab-quvvatlash niyatida.

Shuningdek, nashrga ko‘ra, ba’zi boshqaruvchi rollar bekor qilinishi mumkin. Apple’dan ishdan bo‘shatilgan har qanday menejer xodim sifatida qayta ishga olinishi mumkin, ammo pastroq maosh bilan.