Tesla bir yil ichida dunyodagi eng qimmat avtomobil brendlari ro‘yxatida ikki pog‘onaga ko‘tarilib, birinchi marta Mercedes-Benz va Toyota’dan o‘zib ketdi. Bu haqda Brand Finance xabar berdi.
Tesla brendi hozirda 66,2 milliard dollarga baholanmoqda. Bu o‘tgan yilning shu davriga nisbatan 44 foizga va pandemiyadan oldingi davrdan besh baravar ko‘p.
Brend bahosining bu o‘sishi Tesla uchun ijobiy signaldir, chunki bu brendni yaxshiroq tanilishidan dalolat beradi. Bu esa kelgusida yuqori savdo va daromadga sabab bo‘lishi mumkin, — dedi Brand Finance kompaniyasining baholash bo‘yicha direktori Aleks Xey.
Toyota uchinchi o‘ringa tushib, o‘z qiymatining 18 foizini (52,5 milliard dollar) yo‘qotdi, Mercedes-Benz ikkinchi o‘rinda qoldi (minus 3 foiz, 58,8 milliard dollar).
Xitoyning Sokon avtomobil brendi ushbu sektorda rekord darajadagi o‘sish ko‘rsatdi — bir yilda 123 foizga o‘sdi va 739 million dollarni tashkil etdi.
Brand Finance tahlilchilari tomonidan Ferrari NV “AAA+” reytingi bilan eng kuchli avtomobil brendi deb topildi.
Brend kuchini baholashda kompaniya qiymatdan tashqari ko‘plab ko‘rsatkichlarni, jumladan marketing investitsiyalari, operatsion natijalar va manfaatdor tomonlar o‘rtasidagi munosabatlarni hisobga oladi.
Ferrari brendining qiymati bir yil ichida 8 foizga tushib ketdi. Bu asosan yevroning dollarga nisbatan qadrsizlanishi hisobiga 7,4 milliard dollarga yetdi. Yevroda esa bu ko‘rsatkich 3 foizga oshdi.
Avtomobil ehtiyot qismlari ishlab chiqaruvchilari orasida yaponiyalik Denso yana eng qimmat brendga aylandi. Uning qiymati yil davomida 6 foizga oshib, 4,5 milliard dollarga yetdi.
Shina ishlab chiqaruvchilar segmentida fransuz brendi Michelin yetakchiligicha qoldi (+2 foiz, 7,9 mlrd dollargacha).
Avvalroq global avtomobil bozoridagi tushayotgan talab hamda narx, ortayotgan taklif va O‘zbekistondagi holat haqida ma’lumot berilgan edi.
Izoh (0)