Ўзбекистонда аёллар ва болаларга зўравонлик қилганлик учун қатъий жавобгарлик белгиланмоқда.
Сенатнинг 39-ялпи мажлисида аёллар ва болаларни зўравонликдан ҳимоя қилиш ҳақидаги қонун лойиҳаси кўриб чиқилди ва маъқулланди. Йиғилишда Сенат раиси Танзила Норбоева мазкур ҳужжатнинг аҳамияти ҳақида фикр билдирди.
“Қонунларнинг қатъийлашаётгани, жавобгарликнинг кучайтирилаётгани яхши, лекин бу жамиятимизда аёллар ва болалар ҳуқуқларини ҳимоя қилиш, вояга етмаганларга нисбатан зўравонликнинг олдини олиш учун зарур бўлган охирги восита эмас. Бу нормалар одамларнинг тафаккури ва хотираси билан бирга юрагидан ҳам жой олиши керак. Бутун жамият фаол бўлиши керак. Дунёқараш ўзгариши зарур. Инсонга нисбатан зўравонлик қилиш оғир жиноят эканлиги одамларнинг онгига чуқур ўрнашсагина натижа кутилганидек бўлади. Бу энди биргина ҳуқуқни муҳофаза қилувчи органлар ёки таълим-тарбияга масъул тузилмаларнинггина иши эмас, балки барчамизнинг вазифамизга айланиши зарур”, –– деди Сенат расмийси.
Танзила Норбоеванинг таъкидлашича, 2021-2022 йилларда ҳуқуқни муҳофаза қилувчи органларга аёллар ва қизларга нисбатан тазйиқ ва зўравонлик ҳолатлари юзасидан 72 мингдан зиёд мурожаат келиб тушган.
“Оилавий (маиший) зўравонлик”, “таъқиб этиш”, “шаҳвоний шилқимлик қилиш” каби қонунчилик нуқтаи назаридан янги, лекин реал кундалик ҳаётда аллақачон пишиб етилиб, муаммога айланган тушунчалар киритилаётгани ва бундай хатти-ҳаракатларга нисбатан қатъий жавобгарлик белгиланаётгани жуда муҳим. Жинсий зўравонлик, жумладан, вояга етмаганларга нисбатан жинсий зўравонлик содир этганларга қонунчиликда кўзда тутилган енгилликлар бермаслиги, жазони ўташдан муддатидан илгари шартли озод қилиш ёки жазони енгилроғи билан алмаштириш каби чоралар қўлланмаслиги қатъий белгилаб қўйилмоқда. Бу борада амалдаги нормалардаги турли “туйнуклар” ёпилмоқда”, –– деган Сенат расмийси.
Изоҳ (0)