Yangilanayotgan Konstitutsiya to‘g‘risida ko‘plab davlat va jamoat vakillari munosabat bildirmoqda. Senat raisi Tanzila Norboyeva ham bosh qomusni yangilashning ahamiyati to‘g‘risida munosabat bildirdi. Parlament yuqori palatasi rahbarining so‘zlariga ko‘ra, so‘ngi 6 yilda amalga oshirilgan islohotlar Konstitutsiyani yangilashga turtki bo‘lmoqda.
Konstitutsiyani yangilashning ahamiyati
Senat raisi Tanzila Norboyeva yuqori palataning 39-yalpi majlisida Konstitutsiya yangilanishining dolzarbligi haqida fikr bildirdi.
“Barcha islohotlar bir maqsadga — har bir insonning ushbu yurtda erkin yashashi va barkamol rivojlanishi uchun zarur shart-sharoitlarni yaratishga qaratilgan. Umuman olganda, Konstitutsiyani yangilash ehtiyoji ham aynan amalga oshirilgan o‘zgarishlardan kelib chiqmoqda. Sifat jihatdan rivojlanishning yangi bosqichiga ko‘tarilgan davlat va jamiyat uchun yangi konstitutsiyaviy makon zarur edi.
Erishilgan natijalarni, kafolatlanayotgan huquq va erkinliklar davomiyligini taʼminlash, ularga bo‘lgan yondashuvning o‘zgarmasligi va barqaror bo‘lishi uchun ham ularni ishonchli himoyasini Konstitutsiyada mustahkamlash muhim.
Shu bilan birga, O‘zbekistonning yangi taraqqiyot strategiyasida belgilangan katta vazifalarni bajarish uchun yangi Konstitutsiya mustahkam huquqiy poydevor bo‘lib xizmat qiladi”, –– dedi Senat raisi.
So‘z, eʼtiqod erkinligi va majburiy mehnat
Tanzila Norboyeva majlisda so‘zlagan nutqida mamlakatda inson huquqlarini taʼminlash ishlari aniq natijalarga olib kelganini taʼkidladi.
“So‘z va eʼtiqod erkinligidagi cheklovlar olib tashlandi, ochiqlik va shaffoflik taʼminlandi, davlat organlarining jamoatchilik oldidagi hisobdorligi odatiy holga aylandi. Majburiy mehnat, jumladan, bolalar mehnati butkul barham topdi, xalqaro darajada tan olindi”, — dedi u.
O‘sayotgan iqtisodiyot
Senat raisining qo‘shimcha qilishicha, O‘zbekistonda iqtisodiy muhit ham sezilarli o‘zgargan, tadbirkorlik uchun keng sharoitlar yaratilgan.
“Buning natijasida o‘tgan yilda yalpi ichki mahsulot hajmi ilk bor 80 milliard dollardan oshdi. Iqtisodiyotimizga o‘tgan yilning o‘zida to‘g‘ridan to‘g‘ri 8 milliard dollar xorijiy investitsiyalar kirib keldi, eksportimiz esa 19 milliard dollarga yetdi”, — dedi yuqori palata rahbari.
Maʼlum qilinishicha, respublikada uy-joy qurilishi sohasida oxirgi olti yilda 300 mingta yoki avvalgi yillarga nisbatan 10 barobar ko‘p uy-joylar qurilgan. Joriy yilda aholi uchun yangi uy-joylar qurish hajmini 1,5 barobar oshirib, 90 mingga yetkazish belgilangan.
.jpg)
“Maktab va oliy taʼlimga qamrov oshdi”
Tanzila Norboyeva o‘z nutqida maktabgacha taʼlim qamrovi 5 yil oldingi 27 foizdan 70 foizga yetgani, besh yilda qamrovni 80 foizga yetkazish uchun 600 ming yangi bog‘cha o‘rni yaratilishi belgilanganini aytdi.
“Bu yilning o‘zida 70 ta yangi maktab quriladi, 460 tasi kengaytiriladi. 500 ming o‘quvchi o‘rni yaratilib, ularning jami soni 5,3 millionga yetdi. Xususiy investitsiyalar ishtirokida 100 ta maktab qurish loyihalari boshlanmoqda, 5 yilda ularning soni 1 000 taga yetkaziladi”, — dedi Senat raisi.
Taʼkidlanishicha, o‘tgan 5 yil davomida O‘zbekistondagi oliy taʼlim muassasalari 2,5 barobar ko‘payib, 198 taga yetgan. Qamrov darajasi 9 foizdan 38 foizga oshgan. OTMlarning 41 tasiga akademik va moliyaviy mustaqillik berildi, ularda transformatsiya ofislari ochildi.
“Talabalar uchun imtiyozli taʼlim kreditlari 2 barobar ko‘paytirilib, 2023-yilda 1,7 trillion so‘m ajratiladi. Bu yil ilm-fan va innovatsiyalarga 1,5 trillion so‘m yo‘naltirildi. Bu — 2017-yilga nisbatan qariyb 6 barobar ko‘p”, — dedi Tanzila Norboyeva.
Joriy yilda tibbiyot sohasida qo‘shimcha 140 ta oilaviy shifokor punkti va poliklinikalari, 520 ta olis va chekka mahallada ixcham tibbiyot punktlari tashkil etilishi rejalashtirilgan. Shuningdek, 15 mingga yaqin onkologik bemorlarni nur yordamida davolash uchun DXSH asosida Radiologiya markazlarini ochish ko‘zda tutilmoqda.
Islombek Umaraliyev tayyorladi
Izoh (0)