Farg‘onada viloyat perinatal markazining 19 mlrd so‘m evaziga bunyod etilgan yangi binosi foydalanishga topshirildi (foto)

Farg‘ona viloyati perinatal markazining 4 qavatli zamonaviy neonatal blogi binosi foydalanishga topshirildi. Bu haqda “Daryo” muxbiri Azizjon Ermatov xabar berdi.

Shu munosabat bilan o‘tkazilgan tantanali tadbirda viloyat hokimi Xayrullo Bozorov ishtirok etib, prezident tashabbusi bilan mamlakatda tibbiyot sohasini rivojlantirish, aholi, ayniqsa, ona va bola salomatligini muhofaza qilishga alohida e’tibor qaratilayotganini ta’kidladi. 

Qayd etilishicha, yangi binodan viloyat aholisi uchun reproduktiv salomatlik markazi, konsultativ poliklinika, 18 o‘rinli chaqaloqlar reanimatsiyasi, 20 o‘rinli kam vaznli va chala tug‘ilgan chaqaloqlar uchun parvarish bo‘limi, shahar hamda tumanlardan kelayotgan bemorlar uchun 20 o‘rinli chaqaloqlar kasalligi bo‘limi hamda zamonaviy laboratoriya joy olgan.  

Mazkur zamonaviy muassasada chaqaloqlarga tor doiradagi mutaxassislar tomonidan tibbiy yordam ko‘rsatish va bolalarni katamnestik kuzatuvini olib borish imkoni yaratilgan. 

Ma’lumot uchun, o‘tgan 2022-yilning o‘zida viloyatda 64 ta tibbiyot muassasasida qariyb 150 milliard so‘mlik qurilish-ta’mirlash ishlari amalga oshirilgan.