Maktabgacha va maktab taʼlimi vazirligi, Taʼlim bo‘yicha global hamkorlik (GPE), UNICEF hamda milliy va xalqaro hamkorlar bilan birgalikda, 2023—2026-yillarda taʼlim sohasini isloh qilish bo‘yicha yo‘l xaritasini taqdim etdi. Bu haqda UNICEF matbuot xizmati xabar berdi.
Hujjat O‘zbekistonda 2026-yilgacha bo‘lgan rivojlanish strategiyasiga muvofiq 2026-yilgacha bo‘lgan natijalar va maqsadlar belgilangan maktabgacha va maktab taʼlimini isloh qilishdagi o‘lchash mumkin bo‘lgan ustuvor yo‘nalishlarni belgilaydi.
Rivojlanish bo‘yicha hamkorlar Yo‘l xaritasini tatbiq etish bo‘yicha majburiyatlarini, jumladan, keyingi uch yil davomida taʼlim sohasini takomillashtirishga 580 million dollardan ortiq sarmoya kiritilishni tasdiqlagan.
Maktabgacha va maktab taʼlimi vaziri Hilola Umarovaning qayd etilishicha, yo‘l xaritasi nafaqat taʼlim sohasida ishtirok etuvchi turli manfaatdor tomonlar o‘rtasidagi muvofiqlashtirishni kuchaytirish, “balki eng samarali yechimlarni kengaytirish imkonini berishi kutilmoqda”.
Mazkur Yo‘l xaritasi doirasida quyidagi yo‘nalishlarda birgalikda ish olib borish ko‘zda tutilmoqda:
- o‘qituvchilar malakasini oshirish,
- o‘quvchilar bilimini adolatli baholash tizimini joriy etish,
- maktablarning moddiy texnik bazasini mustahkamlash,
- zamonaviy darsliklar ishlab chiqish va joriy etish,
- ta‘limda boshqaruv tizimini takomillashtirish.
Ta’kidlanishicha, ayni paytda 3 yoshdan 6 yoshgacha bo‘lgan bolalarni qamrab olishni 80 foizga yetkazish uchun maktabgacha taʼlim tizimida qo‘shimcha 620 ming o‘rin hamda 2026-yilgacha xalq taʼlimi tizimidagi maktablarda 1,2 millionga yaqin o‘rin kerak bo‘ladi.
Taʼlim sohasida faoliyat ko‘rsatayotgan tashklotlar o‘rtasida harakatlarni muvofiqlashtirish bo‘lmagani Yo‘l xaritasini ishlab chiqish zarurligini ko‘rsatdi. Endilikda mazkur yo‘l xaritasi 54 ta hamkor tashkilotni birlashtirib, taʼlim sektoridagi islohotlarni amalga oshirish uchun aniq dasturni taʼminlaydi. Mazkur hujjat etika, vijdon, korrupsiyaga qarshi kurash, adolat va inson huquqlarini amalga oshirish tamoyillariga asoslanadi.
.jpg)
“Sifatli inson kapitali davlat o‘shishining asosidir. Mavjud demografik imkoniyatlarni dividendga aylantirish uchun O‘zbekiston, rivojlanish bo‘yicha hamkorlar bilan birgalikda, taʼlimga sarmoya kiritishni ustuvor yo‘nalish qilishda davom etishi kerak. Yo‘l xaritasini ishlab chiqish jarayonida bu yo‘nalishdagi muhim qadamlar belgilab olindi”, dedi UNICEF’ning O‘zbekistondagi vakolatxonasi rahbari Munir Mamedzade.
“Bunga erishish uchun maktab va maktabgacha taʼlim infratuzilmasini kengaytirish va modernizatsiya qilishga yirik sarmoyalar kiritish, shu bilan birga sifatli inklyuziv taʼlimdan foydalanish imkoniyatlarini yaxshilash teng darajada zarurdir”, — deya taʼkidlaydi u.
Ma’lumot uchun, O‘zbekistonda harakatlar strategiyasi doirasida umumta’lim maktablari soni 2017-yilgi 9 718 tadan 2021-yilda 10 289 taga ko‘paygan.
Izoh (0)