O‘zbekistonda atrof-muhit, flora va faunani asrash maqsadida huquqbuzarlarga nisbatan katta miqdordagi jarima jazolarini qo‘llash, hattoki moliyaviy sanksiyalar e‘lon qilish masalalarini qonunchilikka kiritish takliflari ishlab chiqilmoqda. Bu haqda 1-aprel kuni Toshkent Botanika bog‘ida bo‘lib o‘tgan Xalqaro qushlar kuniga bag‘ishlangan tadbirda Tabiat resurslari vaziri Aziz Abduhakimov ma‘lum qildi, deya xabar bermoqda “Daryo” muxbiri.
Aziz Abduhakimov aytishicha, sun‘iy chiqindilarning tabiatga zararini oldini olish maqsadida shunday tur chiqindilarga sabab bo‘luvchi ishlab chiqarishlarni kamaytirish kerak.
“Biz hozirgi kunda bir nechta plastik-polimer mahsulotlarini mamlakatimizda ishlab chiqarilishini ta‘qiqlash bo‘yicha tegishli takliflarimizni hukumatga tayyorlab qo‘ydik”, — dedi vazir.
Uning alohida taʼkidlashicha, ko‘pchilikda chiqindini tabiatga yoki shahar ko‘chalariga tashlash oddiy holatga aylanib qolgan.
“Singapur, Yaponiya yoki Koreya davlatlari tajribasini o‘rganadigan bo‘lsak, ushbu mamlakatlarda saqichmi yoki tamaki qoldig‘i bo‘ladimi, polimer chiqindimi, ularni ko‘chaga uloqtirish, katta miqdordagi jarima jazosiga sabab bo‘ladi. Hattoki ularga nisbatan moliyaviy sanksiyalar qo‘llaniladi. Lekin bizda hali bu joriy etilmagan. Yangi qonunchilikda biz aynan mana shunday choralarni ham e‘tiborga olganmiz. Bular qonunchilikka kiritiladi. Biz shahrimizni, umuman O‘zbekistonimizni ozoda va yashil saqlab qolish uchun ham shunday chora-tadbirlar ustida bosh qotiryapmiz. Xalqimiz orasida ‘Yig‘ishtirilgan joy emas, chiqindi tashlanmagan joy tozadir’, degan naql yuradi. Bu masalani ham vazirligimizning shiorlaridan biriga aylantirmoqchimiz”, — dedi Aziz Abduhakimov.
Tabiat resurslari vaziri aynan qonunchilikda qaysi normalar kiritilayotgani va uni buzganlik uchun qanday choralar ko‘rilishi haqida maʼlumot bermagan.
Maʼlumot uchun, Maʼmuriy javobgarlik to‘g‘risidagi kodeksning 82, 91 va 123-moddasida tabiat va atrof muhitga yetkazilgan zarar uchun turli darajada maʼmuriy choralar belgilab qo‘yilgan.
Avvalroq Aziz Abduhakimov O‘zbekistonda 24 turdagi noyob qushlar yo‘qolib ketish arafasida ekanligini aytib o‘tgan edi.
Izoh (2)
Sharoit qilish kerakku aval,men namunali uylarda yashayman musur yashik qiyib bermaydi 5 yildan beri uyimiz musurga sasib ketadi.Musir moshin 15 kunda 1 marta keladi
Musurlarno qaqa tashaymiz bir narsani qilishdan oldin majburyatni kim oylaydi nima jarima bosa boldimi silaga.Musur yashik yoq qatta bor rasvo xama joy.Musurga pul tulaysan lekin yashik qoyib bermasmish kim qoyadi unda