Россия ташқи ишлар вазири Сергей Лавров ва АҚШ давлат котиби Энтони Блинкен 2 апрель куни телефон орқали мулоқот қилди. Бу ҳақда Россия ТИВ сайтида ва Давлат департаменти сайтида маълум қилинди.
Америка томони ташаббуси билан бошланган суҳбат Россияда жосусликда гумон қилинаётган The Wall Street Journal журналисти Эван Гершковичнинг ҳибсга олиниши ҳақида кетган. Хусусан, Лавров АҚШни “Россиянинг қонунчилиги ва халқаро мажбуриятлари асосида қабул қилинган қарорларини ҳурмат қилишга” чақирган.
“Вашингтон расмийлари ва Ғарб оммавий ахборот воситаларининг бу ишга сиёсий тус бериш ниятида шов-шув кўтаришига йўл қўйилмаслиги таъкидланди”, — дейилади Россия ТИВ матбуот хизматида.
Лавров, Кремль ва Федерал хавфсизлик хизмати каби, Гершкович “журналистлик мақоми ниқоби остида давлат сирини ташкил этувчи маълумотларни тўплаш, махфий маълумотларни олишга уринаётганда жиноят устида қўлга олинганини” айтди.
Ўз навбатида, Блинкен “Россия томонидан WSJ мухбирининг қабул қилиб бўлмайдиган ҳибсга олинишидан АҚШнинг жиддий хавотирини” билдирди ва Эван Гершковични зудлик билан озод қилишга чақирди. Бундан ташқари Кремлдан ноқонуний ҳибсга олинган АҚШ фуқароси Пол Уиланни ҳам зудлик билан озод этишни сўради.
Шунингдек, томонлар дипломатик ваколатхоналарга ўз ишини амалга оширишга рухсат берувчи муҳит яратиш муҳимлигини муҳокама қилди.
Эслатиб ўтамиз, 30 март куни америкалик журналист Гершкович Россиянинг Екатеринбург шаҳрида “жосуслик”да айбланиб ҳибсга олинди. The Wall Street Journal журналистга нисбатан айбловларни рад этиб, уни озод қилишни сўради. Журналист 20 йилгача қамоқ жазосига ҳукм қилиниши мумкин. АҚШ давлат котиби Энтони Блинкен ҳам бунга муносабат билдириб, Америка фуқароларини зудлик билан Россияни тарк этишга чақирди. Польша ҳам ўз фуқароларидан Россияни тарк этишни сўради.
The Wall Street Journal таҳририяти Россия элчиси ва барча россиялик журналистларни АҚШдан чиқариб юборишга чақирди. Bloomberg, The New York Times, The Washington Post ва Politico нашрлари ҳам Россиядан америкалик журналист Эван Гершковични озод қилишни талаб қилди.
Изоҳ (0)