Armaniston Vladimir Putin mamlakatga tashrif buyursa, uni Xalqaro jinoiy sudga topshirishni rejalashtirmayapti. Bu haqda Armaniston parlamenti vitse-spikeri Akop Arshakyan Armenpress agentligiga bergan intervyusida ma’lum qildi.
Xalqaro jinoiy sud (XJS) 17-mart kuni Putinni hibsga olish uchun order bergan. Armaniston 24-mart kuni Konstitutsiyaviy sudi XJSning Rim statutida mustahkamlangan majburiyatlarni mamlakatning asosiy qonunchiligiga muvofiq deb tan oldi. Kreml bu qarorga darhol munosabat bildirdi va buni “qabul qilib bo‘lmasligini” ta’kidlab, “o‘ta salbiy oqibatlar”dan ogohlantirdi.
Shundan so‘ng, Arshakyan Armaniston Rossiya xavotirlariga quloq tutganini va Rim statuti Moskva bilan munosabatlarni buzmasligiga ishonch hosil qilishi mumkinligini aytdi.
“Armaniston Konstitutsiyaviy sudning qarori hech kimni hech qanday masalada aybdor deb hisoblamaydi va hech kimni hibsga olish choralarini talab qilmaydi”, — deydi u.
Bundan tashqari, vitse-spiker yaqinda boshqa davlat bilan imzolangan shartnoma haqida gapirdi, unga ko‘ra Rim statuti ikki tomonlama munosabatlarga ta’sir qilmasligi kerak. U bu qaysi davlat ekaniga aniqlik kiritmagan.
“Bunday kelishuv Rossiya bilan ham bo‘lishi mumkin, bu variantlardan biri xolos. Bir narsa aniq: biz Rossiya tomonidan bildirilgan xavotirlarni eshitdik”, — dedi Arshakyan.
Siyosatchiga ko‘ra, Rim statutining ratifikatsiya qilinishi Armanistonga Ozarbayjon harbiylarini Tog‘li Qorabog‘dagi qurolli mojaro paytidagi jinoyatlar uchun javobgarlikka tortish vositalarini beradi.
Putin Armanistonga tashrif buyursa, hibsga olinishi mumkin
Armaniston Konstitutsiyaviy sudining qarori Xalqaro jinoiy sudning (XJS) tergov palatasi Putinni, shuningdek, Rossiyadagi bolalar huquqlari bo‘yicha komissar Mariya Lvova-Belovani hibsga olishga order berganidan bir hafta o‘tib ma’lum bo‘ldi. Ular harbiy jinoyatlarda, xususan, Ukrainaning bosib olingan hududlaridan bolalarni Rossiyaga majburan deportatsiya qilishda gumon qilinmoqda.
Moskva 2022-yil 24-fevralda Rossiya harbiylarining Ukrainaga hujumi ortidan Ukrainada sodir etilgan harbiy jinoyatlarga aloqadorligini rad etadi. Rossiya XJSning yurisdiksiyasini tan olmaydi va uning ishida ishtirok etmaydi. 2016-yildan beri u sudning harakatlarini belgilaydigan Rim statutining ishtirokchisi emas.
O‘z navbatida, XJS harbiy jinoyatlarni tergov qilish va jazolashda davlat rahbarlarining daxlsizligini tan olmaydi. Putin XJS orderiga asosan Rim statutini ratifikatsiya qilgan 123 ta mamlakatlarga endi kira olmaydi, ular orasida Tojikiston ham bor.
Izoh (0)