Amerikaning The Wall Street Journal gazetasi o‘z muxbiri Evan Gershkovichning Yekaterinburgda hibsga olinishiga bag‘ishlangan redaksion maqola chop etdi. Rossiya Federal xavfsizlik xizmati amerikalik jurnalistni josuslikda ayblamoqda.
Tahririyat Jo Bayden maʼmuriyatini jurnalistni ozod qilishga, shuningdek, Rossiya bilan “diplomatik va siyosiy keskinlashuv” imkoniyatini ko‘rib chiqishga chaqirdi.
“Rossiyaning AQSHdagi elchisi va bu yerda ishlayotgan barcha rossiyalik jurnalistlarning chiqarib yuborilishini kutish mumkin bo‘lgan minimal ish bo‘ladi. AQSH hukumatining birinchi vazifasi o‘z fuqarolarini himoya qilishdir, hozirda juda ko‘p hukumatlar amerikaliklarni qo‘lga olish va qamash mumkin, bu jazosiz qoladi, deb o‘ylamoqda”, — deyiladi maqolada.
WSJ jurnalistlarining fikricha, Gershkovichning hibsga olinishi “Kremlning amerikaliklarni garovga olish odatini kuchaytiradi va Rossiya sivilizatsiyalashgan davlatlar hamjamiyatidan ajralib borayotganiga yana bir dalil bo‘ladi”.
“Prezident Vladimir Putin endi Evan Gershkovichning salomatligi va xavfsizligi uchun javobgardir”, — deb yozadi The Wall Street Journal.
Evan Gershkovich 29-mart kuni Yekaterinburgda qo‘lga olingan. Rossiya Federal xavfsizlik xizmati The Wall Street Journal jurnalisti Rossiya harbiy-sanoat majmuasi korxonalaridan biri haqida maxfiy ma’lumotlarni to‘plaganini da’vo qilmoqda. Kremlning qo‘shimcha qilishicha, Gershkovich “jinoyat ustida ushlangan”. 30-mart kuni Lefortovo sudi jurnalistni josuslikda ayblab, hibsga olishga ruxsat berdi. Jinoyat kodeksining 276-moddasiga ko‘ra, Gershkovich 10 yildan 20 yilgacha ozodlikdan mahrum etilishi mumkin.
Meduza ma’lumotlariga ko‘ra, WSJ muxbiri jurnalistik material ustida ish olib borish uchun Yekaterinburg va Nijniy Tagil shaharlarida bo‘lgan. Yekaterinburglik piar mutaxassisi Yaroslav Shirshikovning aytishicha, Gershkovich shaharga mahalliy aholining “Vagner” guruhi va Rossiyaning Ukrainadagi “maxsus operatsiyasi”ga munosabati haqida material yozish uchun kelgan. Shirshikov jurnalistga Yekaterinburgda hamrohlik qilgan va uni maqolaning ayrim qahramonlari bilan tanishtirgan.
Evan Gershkovich qariyb olti yildan beri Rossiyada yashaydi va Amerikaning The Wall Street Journal gazetasining Moskvadagi byurosida ishlaydi. Jurnalist Rossiya Tashqi ishlar vazirligi tomonidan akkreditatsiya qilingan. Ilgari Gershkovich Agence France-Presse, The Moscow Times va The New York Times gazetalarida ishlagan. Gershkovichning oxirgi maqolasi 28-mart kuni The Wall Street Journal nashrida chop etilgan.
Izoh (0)