AQSH Davlat kotibi Entoni Blinken Rossiyadagi barcha Amerika fuqarolari zudlik bilan mamlakatni tark etishga chaqirdi. Tegishli bayonot Davlat departamenti saytida e’lon qilindi.
.jpg)
Amerikalik diplomatning mazkur bayonoti The Wall Street Journal jurnalisti Evan Gershkovichning Rossiya xavfsizlik xizmati tomonidan hibsga olinishi fonida e’lon qilindi. Blinken AQSH Davlat departamentining ustuvor vazifasi xorijdagi Amerika fuqarolarining xavfsizligi ekanini ta’kidladi.
“Kremlning jurnalistlar va fuqarolik jamiyati vakillarini qo‘rqitish, repressiya qilish va jazolash bo‘yicha davom etayotgan sa’y-harakatlarini keskin qoralaymiz. Biz Rossiya federatsiyasi hududida AQSH fuqarolariga tahdid solayotgan xavf haqida qattiq ogohlantirishimizni takrorlaymiz. Rossiyada yashovchi yoki sayohat doirasida qolgan amerikaliklar zudlik bilan u yerni tark etishi kerak”, — dedi Davlat kotibi.
Shuningdek, siyosatchi uning idorasi amerikalik muxbirning hibsga olinishi bilan bog‘liq vaziyat bo‘yicha The Wall Street Journal vakillari bilan aloqada ekanini ta’kidladi.
The Wall Street Journal nashri jurnalistining hibsga olinishi
30-mart kuni Rossiya federal xavfsizlik xizmati (RFXX) Yekaterinburgda WSJ gazetasi muxbiri Evan Gershkovichni josuslikda gumon qilib hibsga oldi.
Rossiya xavfsizlik xizmatiga ko‘ra, Evan Gershkovich Amerika tomonining ko‘rsatmasi bo‘yicha Rossiya harbiy-sanoat kompleksi korxonalaridan birining faoliyati to‘g‘risida davlat sirini tashkil etuvchi ma’lumotlarni to‘plagan.
“Gershkovich maxfiy ma’lumotlarni olishga urinayotganda, Yekaterinburgda qo‘lga olindi», — deya ta’kidladi RFXX.
Rossiya xavfsizlik xizmatining Tergov departamenti AQSH fuqarosiga nisbatan Jinoyat kodeksining 276-moddasi (josuslik) bo‘yicha jinoiy ish qo‘zg‘atdi.
Rossiya TIV rasmiy vakili Mariya Zaxarova WSJ nashri xodimi faoliyatining jurnalistikaga hech qanday aloqasi yo‘qligini aytdi.
“Amerikaning WSJ nashri xodimi Yekaterinburgda qilgan ishining jurnalistikaga aloqasi yo‘q. Afsuski, xorijliklar mamlakatimizda “xorijiy muxbir” maqomi, jurnalist vizasi va akkreditatsiyadan jurnalistikaga tegishli bo‘lmagan faoliyatni yashirish uchun foydalanayotgani birinchi holat emas. Bu qo‘lga olingan birinchi taniqli g‘arblik emas”, — degan Zaxarova.
Bundan tashqari, Rossiya prezidentining matbuot kotibi Dmitriy Peskov jurnalistning hibsga olinishiga izoh berdi.
“Bizga ma’lum bo‘lishicha, u jinoyat ustida qo‘lga olingan”, — dedi Kreml matbuot kotibi.
Shu bilan birga, Peskov “oddiy jurnalistik faoliyat” bilan shug‘ullanuvchi The Wall Street Journal vakillarining Rossiyada keyingi faoliyati uchun hech qanday to‘siq ko‘rmayotganini ta’kidladi.
WSJ Rossiya hibsda saqlanayotgan muxbir Gershkovichga qo‘yilgan ayblovlarni rad etib, uni zudlik bilan ozod qilishni talab qilmoqda.
Ma’lumot o‘rnida, Evan Gershkovich 1986-yildan beri Rossiyada josuslikda ayblanib hibsga olingan birinchi amerikalik jurnalist bo‘ldi. 1986-yil 2-sentabrda «U.S. News & World Report» jurnalida ishlagan Nikolas Daniloff SSSRda hibsga olingandi
Izoh (0)