Shavkat Mirziyoyev Berdaq nomidagi Qoraqalpoq davlat akademik musiqali teatrida o‘tkazilgan millatlararo totuvlikka bag‘ishlangan madaniy tadbirda ishtirok etdi. Bu haqda Prezident matbuot xizmati xabar berdi.
Xabarga ko‘ra, qariyb 100 yillik tarixga ega ushbu muassasa sanʼat rivojida, yoshlar tarbiyasi va aholining madaniy hayotida munosib o‘ringa ega. Oxirgi yillarda teatr joriy taʼmirlanib, asbob-uskunalar yangilandi. 2017-yilda unga akademik teatr maqomi berildi.
Davlat rahbari bu yerda yoshullilar, sanʼat sohasi vakillari bilan birga badiiy dasturni tomosha qildi.
Qoraqalpog‘istonda ko‘plab millat vakillari ahil va totuv yashamoqda. Dasturda shu jihat taʼsirchan talqinlarda ifodalandi. Xalq dostonlaridan parchalar, “Shag‘ala”, “Dembermes”, “Nigarim” kabi kuy-qo‘shiqlar ijro etildi. Alisher Navoiy, Berdaq, Maxtumquli va Abay ijodidan namunalar o‘qildi. O‘zbekiston Qahramoni Ibroyim Yusupov qalamiga mansub “Tug‘ishganlik” sheʼri va “O‘zbekiston” qo‘shig‘ida millatlararo totuvlik, og‘zibirchilik, tinchlik qadri tarannum etildi.
Qayd etilishicha, prezident shu yerda qoraqalpog‘istonlik ijodkorlar, madaniyat sohasi vakillari bilan muloqot qildi. Badiiy dasturni yuqori baholadi.
“O‘zbek va qoraqalpoqlar ikki tilli bir el. Asrlar davomida birga yashab, do‘st, qarindosh bo‘lib, bir xalqqa aylanib ketgan. Ular bugun mamlakat tinchligi va taraqqiyoti yo‘lida hamjihat. Bu nafaqat sahnada, balki hayotimizda ham o‘z ifodasini topmoqda”, deyiladi xabarda.
Davlat rahbari ushbu qadriyatlarni ulug‘lovchi asarlarni ko‘proq qo‘yish, gastrollarga chiqib, yoshlarni teatrga qaytarish, madaniyatini boyitish muhimligini taʼkidladi.
Izoh (0)