Jizzax viloyati Mirzacho‘l tumani xalq taʼlimi bo‘limi mansabdorlariga nisbatan jinoyat ishi qo‘zg‘atildi. Bu haqda O‘zA xabar berdi.
Xabarga ko‘ra, Davlat xavfsizlik xizmatining Jizzax viloyati bo‘yicha boshqarmasi materiallari asosida viloyat Davlat moliyaviy nazorati boshqarmasi tomonidan o‘tkazilgan tekshiruv natijasida Mirzacho‘l tumani xalq taʼlimi bo‘limi faoliyatida qonunbuzilish holatlari aniqlandi.
Keltirilishicha, o‘rnatilgan tartib-qoidalarga zid ravishda ortiqcha sinflar shakllantirilishi, taʼtil, ish haqi va ustama pullari ortiqcha to‘lanishi, qurilish-taʼmirlash ishlarida qo‘shib yozish, umumiy o‘rta taʼlim maktablaridagi tovar-moddiy boyliklarda kamomadlar mavjudligi va boshqa holatlar natijasida davlatga 1 milliard 593 million so‘m miqdorida zarar yetkazilgan.
Hozirda Mirzacho‘l tumani xalq taʼlimi bo‘limi mansabdor shaxslari va boshqalarga nisbatan Jinoyat kodeksining 205- (hokimiyat yoki mansab vakolatini suiisteʼmol qilish) va 167- (o‘zlashtirish yoki rastrata yo‘li bilan talon-toroj qilish) moddalari bilan jinoyat ishi qo‘zg‘atilgan.
Izoh (0)