Toshkent viloyatida kanallarni tozalash uchun ajratilgan 155 mln so‘mni o‘zlashtirgan MCHJ rahbari ushlandi
Toshkent viloyati Bo‘ka tumanida kanallarni tozalash uchun ajratilgan qariyb 155 million so‘mni o‘zlashtirgan MCHJ rahbari ushlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, departamentning Bo‘ka tuman bo‘limi tomonidan o‘tkazilgan tergovga qadar tekshiruvda, “B.” MCHJ rahbari M.X. tuman irrigatsiya bo‘limi tasarrufidagi 5 ta kanalni tozalashda hujjatlarga amalda bajarilmagan ishlarni qo‘shib yozish orqali jami 154,9 million so‘mni o‘zlashtirish yo‘li bilan talon-toroj qilgani aniqlangan.
Shuningdek, departamentning Bag‘dod tuman bo‘limi tomonidan o‘tkazilgan tergovga qadar tekshiruvda, “D.P.” MCHJ hamda “S.T.” UK Farg‘ona viloyati filiali masʼul shaxslari tumandagi oqava suv tarmog‘i qurilishida hujjatlarga amalda bajarilmagan ishlarni qo‘shib yozish orqali jami 373,5 million so‘mni o‘zlashtirish yo‘li bilan talon-toroj qilgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari o‘tkazilmoqda.
